प्रशान्त टापु राष्ट्र किरिबाटीले सबैभन्दा पहिले नयाँ वर्ष २०२३ लाई स्वागत गरेको छ । किरिबाटी पछि न्यूजील्याण्डमा नयाँ वर्ष मनाइएको छ । कोरोनाका कारण विगत ३ वर्षदेखि सर्वसाधारणले नयाँ वर्ष धुमधामसाथ मनाउन पाएका थिएनन् । त्यसैले पनि यसपालि सर्वसाधारण विभिन्न स्थानमा उपस्थित भएर नयाँ वर्षलाई स्वागत गरेका छन् । नयाँ वर्ष लागेसँगै स्काइलाइन, आतिशबाजी र बत्तीका कारण उज्यालो भएका छन । नयाँ वर्ष मनाउन न्यूयोर्कको टाइम्स स्क्वायर हजारौँ मानिस जम्मा भएका छन् ।
चीनको वुहानमा हजारौं मानिसहरू नयाँ वर्ष मनाउन भेला भएका छन् । यस नयाँ वर्षको उत्सवमा, नागरिकहरूले कोभिड कथा सुरु भएको वुहानको परम्परा अनुसार घडी १२ बज्दा आकाशमा बेलुनहरू छोडे। थाइल्यान्ड र ताइवानले पनि विशाल आतिशबाजीको प्रदर्शन गर्दै नयाँ वर्ष मनाएका छन् । अस्ट्रेलियाले नयाँ वर्षलाई स्वागत गर्न चकित पार्ने आतिशबाजी प्रर्दशन गरेका छन् ।
नयाँ वर्षको पूर्वसन्ध्यामा सिड्नी हार्बर ब्रिजमा चर्को आतिशबाजीले उज्यालो बनाएको थियो । यस्तै, आकाशलाई विभिन्न रंगहरूले रंगाइएको थियो । संयुक्त अरब इमिरेट्सले दर्जनौं स्थानहरूमा कीर्तिमान तोड्ने आतिशबाजीको शानदार प्रदर्शनको साथ वर्ष २०२३ लाई फरक शैलीमा स्वागत गरेको छ । युएईले दर्जनौं स्थानहरूमा आतिशबाजी, ड्रोन शो प्रदर्शन गरेको छ । यो सँगै विभिन्न देशले आतिशबाजी, स्काइलाइन, झिलिमिली बत्ति, कन्सर्ट गरेर नयाँ वर्ष मनाएका छन् ।
पर्यटकको भीड भाड हुने नेपालको राजधानी काठमाडौंको ठमेल, बौद्ध, पोखरालगायत स्थानमा हजारौँ व्यक्ति सडकमा आएर नयाँ वर्ष मनाएका छन् । यस्तै, प्रत्येक नयाँ वर्षमा मानिसहरुले नयाँ संकल्प लिने गरेका छन् । यस्ता संकल्पलाई लिएर मानिसले केही नयाँ गर्ने प्रण गर्ने गरेका छन् । तर यस्ता संकल्प भने धेरै कमले मात्रा पुरा गर्ने गरेका छन् ।
स्वस्थ खाना खाने, बढी व्यायाम गर्ने, पैसा बचत गर्ने, सामाजिक सञ्जाललाई कम प्रयोग गर्ने, र धुम्रपान तथा मद्यपान छोड्ने यस्ता संकल्पहरू हुन् जुन मानिसहरूले लगभग हरेक वर्ष गर्छन् तर अनुसरण गर्न असफल हुन्छन् ।
