पोखरा,१३ पुस । गण्डकी प्रदेश सभाका ज्येष्ठ सदस्य मित्रलाल बस्यालले प्रदेश प्रमुख पृथ्वीमान गुरुङबाट पद तथा गोपनीयताको सपथ लिनुभएको छ । प्रदेश प्रमुखको सरकारी निवासमा बुधबार आयोजित एक समारोहमा उहाँले सपथ लिनुभएको हो ।
बस्याल पर्वतजिल्ला निर्वाचन क्षेत्र न १ को (२) बाट नेकपा एमालेका तर्फबाट प्रदेश सभा सदस्यमा निर्वाचित बन्नुभएको थियो । उहाँको जन्म विसं २०१४ भदौ ५ गते पर्वतमा भएको थियो ।
संवैधानिक व्यवस्था अनुसार प्रदेश प्रमुखले प्रदेशसभा सदस्यका ज्येष्ठ सदस्यलाई सपथ खुवाउने र ज्येष्ठ सदस्यले अन्य सदस्यलाई सपथ खुवाउने प्रावधान छ ।
ज्येष्ठ सदस्य बस्यालले बिहीबार अन्य सदस्यलाई सपथ खुवाउने कार्यक्रम छ । सपथ ग्रहण समारोहमा गण्डकी प्रदेशका मुख्यमन्त्री कृष्णचन्द्र नेपाली पोखरेल, मन्त्रीहरू, नवनिर्वाचित प्रदेश सभा सदस्यहरू लगायतको उपस्थिति रहेको थियो ।
