पोखरा, ८ पुस । पोखराका सडक छेउमा गीत गाएर दैनिक गुजारा गर्दै आएका २२ जना दृष्टिविहीनलाई आर्थिक सहयोग गरिएको छ । कास्कीको लामा अमृत फाउण्डेशन घान्द्रुकले प्रति व्यक्ति ६ हजार पाँच सय रुपैयाँका दरले ति दृष्टिविहीनलाई आर्थिक सहयोग गरेको हो । लामा अमृत फाउण्डेशन घान्द्रुकका संस्थापक अमृत गुरुङको अगुवाई तथा लोकदोहोरी गायिका प्रिति आलेमगरको संयोजनमा संकलित उक्त रकम उनीहरुलाई प्रदान बताइएको छ ।
सहयोगदाता तेजबहादुर गुरुङ, अभियन्ता तथा गायिका प्रिति आले र अमृत लामा गुरुङले देश–विदेशमा रहेका नेपालीसँग एक लाख ४३ हजार रुपैयाँ संकलन गरी २२ जना दृष्टिविहीनलाई प्रतिव्यक्ति ६ हजार पाँच सयका दरले वितरण गरेको जानकारी फाउण्डेशनका संस्थापक अमृत लामाले दिनुभयो । सहयोग रकम प्रदान गर्दै सहयोगदाता मध्येका एक तेजबहादुर गुरुङले देश–विदेशमा रहेका नेपालीको सहयोगमा रकम संकलन गरेर पहिलो पटक दृष्टिविहिन नागरिकहरुलाई आर्थिक सहयोग गरेको बताउनुभयो ।
सहयोग रकम प्रदान गर्दै गुरुङले ‘हाम्रो यो सहयोग तपाइँहरुलाई यथेष्ट हुँदैन तरपनि घाउमा सानो मलम लगाउ भन्ने हेतुले सहयोग गरेका हौं, उहाँले भन्नुभयो ‘सडकमा तपाइँहरुले आफ्नो प्रतिभा देखाउनु भएको छ, । त्यसैले प्रतिभाको कदर गर्दै सक्दो सहयोग गर्नु हरेक नागरिकको दायित्व हो ।’ गीत गाएर गुजारा चलाउदै आएका दृष्टिविहिनसँगै आफूले गाएको एउटा भिडियो टिकटकमा भाइरल भएको स्मरण गर्दै अभियान्ता प्रितिले भन्नुभयो, ‘एउटा दृष्टिविहीन दाइसँग गाएको गीत टिकटकमा धेरैले माया गर्नुभएको थियो । त्यहाँ आएको कमेन्टमा धेरै आर्शीवाद थिए । त्यसैले आर्शीवाद उधारो राख्न हुदैन भन्ने सोचेर सहयोग अभियानमा जुटेकी हुँ ।’
यस्तै दृष्टिविहीन नागरिकको तर्फबाट बोल्दै हेमबहादुर परियारले राज्य र संघ–संस्थाबाट उचित सहयोग नपाएको गुनासो गर्नुभयो । आफूहरुको सडकमा गीत गाउनु रहर नभई बाध्यता रहेको उहाँले बताउनुभयो ।
