नेपालमा रियालिटी शोको बाढी नै आएको छ । गायक, नृत्य तथा युवा लक्षित विभिन्न रियालिटी सोहरु सञ्चालन हुँदै आएका छन् । युवा लक्षित कतिपय रियालिटी शो हरुले समाजको रियल तस्विर प्रस्तुत गर्नुभन्दा पनि अश्लिलता फैलाएको सर्वसाधारणको आरोप छ । अहिले यस्तै एउटा शो व्लाइन्ड डेटले अश्लिलता फैलाएको भन्दै सर्वसाधारणले शोको प्रसारण रोक्नुपर्ने माग गरेका छन ।
रियालिटी शो ‘ब्लाइन्ड डेट’ को नाम धेरैले सुन्नुभएको होला । रियालिटी शो भनिए पनि यो शोमा रियालिटी भन्दा अश्लीलता बढी हाबी भएको छ । ब्लाइन्ड डेट को अर्थ हो आपसमा अपरिचित दुई युवा र युवती एकैपटक डेटिङ स्पटमा भेट्ने र एक अर्कालाई बुझ्ने । यो अवधारणामा विश्वका थुप्रै राष्ट्रमा राम्रा रियालिटी शोहरू बन्ने गरेका छन् । त्यसकै नक्कल गरी नेपालमा पनि यो सो सञ्चालन गरिएको हो । तर, अक्कलविनाको भद्दा नक्कल झैँ भएको छ नेपालमा । अहिले चलिरहेको ब्लाइन्ड डेटको तेस्रो सिजन यति अपाच्य र घिनलाग्दो छ कि दर्शकले यसमाथि प्रतिवन्धकै माग गर्न थालेका छन् ।
सुरुमा दुई अन्जान व्यक्तिहरू एक स्थानमा आउँछन् । परिचय गर्छन् । त्यसपछि सिधै सुरु हुन्छ द्वीअर्थि संवाद । उनीहरू घुमाएर फिराएर यौनजन्य भन्दा बाहेकका अरु कुरै गर्दैनन् । जोडीहरूको गफ सुन्दा कहीँ कतै पनि लाग्दैन कि त्यो ब्लाइन्ड डेट अर्थात पहिलो अन्जान भेट हो । न त उनीहरूबीच हुने कुराकानीहरू स्वस्फुर्त हुन् । उनीहरूले बोलेका ९० प्रतिशत संवादहरू स्क्रिप्टेड हुन् भन्ने सहजै अनुमान लगाउन सकिन्छ ।
ब्लाइन्ड डेटको पहिलो सिजन २०७७ सालमा प्रशारण भएको थियो । स्क्रिप्टेड नै भए पनि पहिलो सिजन केही हदसम्म मनोरञ्जक थियो र धेरै किशोर–किशोरीहरू यसमा झुम्मिएका थिए । अहिले यो शोमा द्विअर्थी कुरामात्र हुँदैन, खुलेरै यौनजन्य संवाद र अश्लील क्रियाकलापहरू समेत हुन थालेका छन् । नेपालको कानूनअनुसार सार्वजनिक स्थानमा अश्लीलता प्रदर्शन गर्न पाईँदैन । युट्यूव भनेको पनि सार्वजनिक प्लेटफर्म हो । अहिले सबैको हातमा मोबाइल र इन्टरनेट छन् ।
नेपालमा बच्चादेखि बुढासम्मले युट्यूव हेर्ने गर्छन । यस्ता सामग्रीहरू बालबच्चाको पहुँचमा पुग्दा यसले उनीहरुमाथि नराम्रो असर पर्ने गर्दछ । डिस्क्लेमर लेखेको भरमा १८ वर्ष मुनिका बालबालिकाहरू यो कार्यक्रम हेर्न पक्कै रोकिँदैनन् । त्यसमाथि ठगलाइफ नेपाल जस्तो ११ लाख फलोअर्स भएको पेजले यो अश्लील कार्यक्रमलाई प्रवद्र्धन गर्दै आएको छ ।समाजलाई नै असर गर्ने यस्ता खालका कार्यक्रमहरु बन्द गर्नुपर्ने संस्कृतिविद् डा निर्मला पोखरेल बताउछिन् ।
प्रहरी वरिष्ठ उपरीक्षक तथा केन्द्रीय प्रहरी प्रवक्ता दान बहादुर कार्कीले नेपालको प्रचलित कानुन अनुसार अश्लीलता प्रदर्शन गर्न नपाइने हुँदा, कानुन विपरित क्रियाकलाप भएमा आबश्यक कारवाहि हुने बताए ।
