पोखरा, २८ मंसिर । नेकपा (माओवादी) केन्द्रका अध्यक्ष पुष्पकमल दाहाल प्रचण्डले अब बन्ने नयाँ सरकार पाचदलीय गठबन्धकै हुने बताएका छन् । बुधबार आफ्नो जन्म गाउँ कास्कीको अन्नपूर्ण गाउँपालिका वडा नम्बर १ स्थित महेन्द्र आधारभूत विद्यायलयको हीरक जयन्ती महोत्सवमाको उद्घाटन गर्दै यस्तो कुरा सुनाएका हुन् । सरकार गठबन्धनकै हुन्छ,’ उनले भने, ‘अहिले सरकार गठनको विषय चलिरहेको छ ।’ सरकार कसको नेतृत्वमा बन्ने भन्ने विषयले प्रवेश पाइसकेको छैन उनले भने –आवश्वक परे माओवादीले पनि सरकाको नेतृत्व लिन सक्छ ।
प्रचण्डले आफू प्रधानमन्त्री भए भ्रष्टाचार गर्नेहरुलाई कडा कारबाही गर्ने बताएका छन् । प्रचण्डले भने,’ देशको नेतृत्व गर्ने अवसर प्राप्त भए भ्रष्टाचार नियन्त्रण गर्छु । भ्रष्टाचार नियन्त्रण यो देशको विकासका लागि अनिवार्य सर्त छ ।’ सरकार निर्माणमा अब कसरी अगाडि बढ्ने भनेर घनिभूत रुपमा गृहकार्य भइरहेको छ, प्रचण्डले भने, ‘यो पटकको निर्वाचनमा जनताले प्रमुख राजनीतिक दललाई अवसर र चुनौती दिएका छन् । सुशासन र समृद्धिको दृष्टिकोणले जनतालाई केही दिन आवश्यक छ । यो निर्वाचनबाट केही नयाँ राजनीतिक दल जन्मिएका छन् । नयाँ दललाई नकारात्मक होइन सकारात्मक रुपमा लिनुपर्छ ।’
प्रचण्डले आउँदो निर्वाचन कास्कीबाट लड्ने संकेत गरेका छन् । अहिलेसम्मका निर्वाचनमा हरेक पटक फरकफरक क्षेत्रबाट चुनाव लडेको भन्दै अर्कोपटक कास्कीबाट लड्ने सक्ने उक्त अवसरमा उनले सुनाए । ‘मैले पहिलो पटक काठमाडौं र रोल्पाबाट निर्वाचन लडें । दोस्रो पटक मधेशबाट लडें । यसपछि फेरि चितवनबाट लडें अहिले गोरखाबाट चुनाव जितेर आएको छु,’ प्रचण्डले भने, ‘मलाई लाग्छ समय भनेजस्तो भयो भने अर्को पटक कास्कीबाट पनि चुनाव लड्न सक्छु ।’
