अमेरिका र क्यानडा लैजाने प्रलोभन देखाइ मानव तस्करी गरी ठगी गर्ने मुख्य गिरोहलाई प्रहरीले सार्वजनिक गरेकाे छ।
काठमाडाैँ उपत्यका अपराध अनुसन्धान कार्यालयले पक्राउ परेका ३ जनालाई साेमबार सार्वजनिक गरेकाे हाे।
पक्राउ पर्नेमा ओखलढुंगाका ४८ वर्षीय जगतबहादुर तामाङ, तनहुँका ४६ वर्षीय विष्णुबहादुर बराली र तनहुँकै ४८ वर्षीय जंगबहादुर विक रहेका छन्।
उनीहरूलाई काठमाडाैँ उपत्यका अपराध अनुसन्धान कार्यालयकाे टाेलीले कञ्चनपुरको गड्डाचौकी नजिकैबाट लुकीछिपी रहेकाे अवस्थामा आइतबार पक्राउ गरिएको कार्यालयका प्रवक्ता सूचना अधिकारी प्रहरी उपरीक्षक रवीन्द्र रेग्मीले जानकारी दिए।
उनीहरूले अमेरिका, क्यानडालगायतका मुलुकहरुमा प्रतिव्यक्ति ४ लाखमाथिको आकर्षक तलब हने प्रलोभनमा पारी अमेरिका जानको लागि प्रतिव्यक्ति ४० देखि ५० लाख र क्यानडाको लागि प्रतिव्यक्ति २२ देखि ३० लाखसम्म लाग्ने भनी विश्वास दिलाएर १० जना पीडितबाट ५ करोड ५० लाख रकम लिएर खुलेकाे प्रहरीले जनाएकाे छ।
नेपालमा टासी शेर्पा, ङिमवटी शेर्पा र निमा शेर्पालाई एजेन्टको रुपमा राखी उनीहरूले भारतको नयाँ दिल्लीमा बसेर संगठित रुपमा मानव तस्करी एवम् ठगी गर्दै आएको प्रहरीकाे दाबी छ।
प्रहरी उपरीक्षक रेग्मीका अनुसार अमेरिका लैजाँदा दुबई ट्रान्जिट बनाएर केन्या र युगान्डा लगेर राहदानी तथा डलर खोसी ६ देखि ९ महिनासम्म अलपत्र पारी राखेको थिए।
उनीहरूले केन्या र युगान्डामा सम्बन्धित देशको नागरिकसमेतलाई एजेन्ट राख्ने गरेको थिए। अमेरिका पुऱ्याउन ब्राजिल, कोलोम्बिया, मेक्सिकोमध्ये कुनै एक रुट प्रयोग गर्ने गरेको खुल्न आएको प्रवक्ता रेग्मीले भनाइ छ।
पक्राउ परेका तामाङ, बराइली र विक भारतको दिल्ली पहाडगंजस्थित होटलमा बसि संगठित रुपमा मानव तस्करीमा संलग्न रहेका खुल्न आएको उनले बताए।
