बाहिरी लुगा खरिद गर्दा आफूलाई सुहाउँछ कि सुहाउँदैन भनेर जति ख्याल गरिन्छ, भित्री बस्त्र खरिद गर्दा त्यसमा ध्यान दिइँदैन । पुरुषको तुलनामा महिलाहरु यस कुरामा सचेत हुनुपर्छ । किनभने उनीहरुले ब्रा तथा पेन्टीको खरिद गरिरहँदा त्यसको गुणस्तर, आफ्नो शारीरिक बनौट जस्ता धेरै कुरामा ख्याल गर्नुपर्छ । यदि त्यसो गरिएन भने भित्री बस्त्रले स्वास्थ्यमा समेत प्रभाव पार्छ ।
ब्रा बिभिन्न साइजको हुन्छ । आफूलाई कुन साइजको ब्रा फिट हुन्छ भन्ने कुरामा महिलाहरुले जानकारी राख्नैपर्छ । तर पनि आफ्नो ब्रेस्टको सही साइज थाहा नभएर हो कि, उनीलाई यसको असरबारे हेक्का नभएर हो कि ? किन हो महिलाले गलत साइजको ब्रा लगाइरहेका हुन्छन् ।
अर्काे महत्वपूर्ण कुरा भनेको बस्त्रको छनौट गर्दा त्यसको गुणस्तरमा ख्याल गर्नैपर्छ । धेरैजसो महिला त सस्तो ब्रा खरिद गर्न रुचाउँछन् । जबकी भित्री बस्त्र गुणस्तरिय हुनैपर्छ । गुणस्तरीय भएपछि त्यो तुलनात्मक रुपमा महँगो त हुने नै भयो ।
भित्री बस्त्र अर्थात ब्रा गुणस्तरीय हुनुपर्छ । उचित आकारको हुनुपर्छ । यस्तो ब्रा लगाउँदा कुनै असजिलो अनुभव हुनुहुँदैन । साथै त्यसले छालालाई असर पनि गर्नु हुँदैन । किनभने महिलाले निरन्तर लामो समयसम्म लगाइरहने ब्रा सही आकारको भएन भने त्यो असजिलो मात्र हुँदैन, त्यसले ब्रेस्टको आकार एवं सेपमा समेत असर गर्छ ।
छरितो देखाउनका लागि कतिले कसिलो ब्रा लगाउँछन् । यसले रक्त प्रवाहमा बाधा पु¥याउँछ । छालामा दाग बस्ने सम्भावना हुन्छ भने खुकुलो ब्रा लगाउँदा आफ्नो सौन्दर्य खुल्दैन । साथै ब्रेस्टको सेप पनि बिग्रन्छ । त्यसैले सही आकारको ब्रा लगाउनुपर्छ ।
ब्रा खरिद गर्दा त्यो आफ्नो ब्रेस्टमा फिट हुन्छ हुँदैन भन्ने कुरालाई बढी ख्याल गर्नुपर्छ । धेरै कसिलो वा धेरै खुकुलो ब्रा लगाउने गल्ती गर्नुहुँदैन । साथै सस्तोको लोभमा गुणस्तरहिन ब्रा पनि लगाउनु हुँदैन ।
