काठमाडौं । युक्रेनले नेपाली युवाहरूलाई रुसी सेनामा नपठाउन आग्रह गरेको छ । युक्रेनले सेनामा भर्ना हुन जाने कार्य तत्काल रोक्न नेपाललाई आग्रह गरेको हो ।
“नयाँदिल्लीमा रहेको युक्रेनको दूतावासले हामीलाई नेपाली युवा रुसी सेनामा भर्ना हुन जाने गतिविधि तत्काल रोक्न आग्रह गरेको छ,” स्रोतले भन्यो ।
नेपाल र युक्रेनबीच मैत्रीपूर्ण सम्बन्ध रहेका कारण यस्ता गतिविधि नरोकिए सम्बन्धमा चिसोपना बढ्नेतर्फ पनि युक्रेनको दूतावासले सतर्क गराएको स्रोतले जनाएको छ ।
रुस–युक्रेन युद्ध सुरु भएपछि ठूलो संख्यामा नेपाली रुसी सेनामा भर्ना भएको अनुमान गरिएको छ । परराष्ट्र मन्त्रालय अन्तर्गतको कन्सुलर सेवा विभागमा मात्र ३० जनाका परिवारले रुसी सेनामा रहेका आफ्ना आफन्तलाई उद्धार गरी फर्काउन आवेदन दिएका छन् ।
युक्रेनको नियन्त्रणमा रहेका नेपालीको संख्या चार पुग्यो
रुस–युक्रेनमा युद्धमा हालसम्म ६ जना नपाली मारिएका छन् । मारिएका सबै रुसी सेनामा कार्यरत थिए ।
परराष्ट्र मन्त्रालयले हालैमात्र नेपालका लागि रुसी राजदूतलाई बोलाई नेपालीलाई सेनामा भर्ती गर्ने कार्य रोक्न र भर्ती भएकालाई तत्काल फिर्ता पठाउन भनेको छ । यसै विषयलाई लिएर मन्त्रालयले रुसलाई कूटनीतिक नोट पनि पठाएको छ ।
