पोखरा, २४ कात्तिक । राजनीतिक स्थायित्वसँगै अर्थतन्त्रलाई चलायमान बनाउन पाँच दलीय गठबन्धनमा आवद्ध पार्टीहरुले जनतामाझ आफ्ना प्रतिवद्धता व्यक्त गर्नुपर्ने विहीबार पोखरामा आयोजित एक कार्यक्रममा जोड दिइएको छ । नेपाली काँग्रेस केन्द्रीय पर्यटन समन्वय तथा चुनाव प्रचार प्रसार समिति कास्कीद्धारा आयोजित प्रतिनिधि तथा प्रदेश सभा सदस्यका लागि पाँच दलीय गठबन्धनका उम्मेदवारबीच भेटघाट तथा शुभकामना कार्यक्रमका बोल्दै नेपाल उद्योग वाणिज्य महासंघका पूर्व अध्यक्ष तथा काँग्रेस नेता आनन्दराज मुल्मीले देशको अर्थतन्त्र अत्यन्तै नाजुक अवस्थामा पुगेकाले यसलाई चलायमान बनाउन पाँच दलीय गठबन्धनमा आवद्ध पार्टीले जनतामाझ आफ्ना प्रतिवद्धता व्यक्त गर्नुपर्ने बताउनुभयो ।
पाँच वर्ष यता नेपाल आर्थिक रुपमा निकै कमजोर भएको छ, मूल्य वृद्धिले नेपाली नागरिकले दैनिक जीवन चलाउन सकेका छ्रैनन्, उत्पादन घटेको छ, उद्योगहरु धाराशाही बनेका छन् नेता मुल्मीले भन्नुभयो–वित्त नीति ठिक नभएकै कारण व्यवसायी चर्को ब्याजको मारमा परेका छन् । विश्व परिवेशलाई हेर्दा एक्लो व्यक्तिको निर्णयले त्यस देशका नागरिकले निकै दुःख कष्ट भोग्नु परेको छ, एमाले अध्यक्ष केपी वलीका अघिल्ला क्रियाकलापले पनि उहाँका तानाशाही प्रवृति देखाउछ, त्यसैले पाँच दलीय गठबन्धनका उम्मेदवारलाई जिताउन जरुरी छ ,मुल्मीले भन्नुभयो ।
राष्ट्र बैंकमा राजनीतिकरण सुरु भएको छ, वित्तीय संस्थाको चर्को व्याजदरका कारण उद्योगी व्यवसायी मानसिक तनाबमा परेका छन्, वित्तीय संस्थाले उद्योगी व्यवसायीका घरजग्गा लिलामीमा राखेर त्रास फैलाएका छन् मुल्मीले भन्नुभयो– वित्तीय संस्थालाई नियमन गर्ने निकाय सक्रिय हुन समेत उहाँले आग्रह गर्नुभयो ।
सोही अवसरमा बोल्दै कास्की निर्वाचन क्षेत्र नं ३ तर्फ प्रतिनिधि सभा सदस्यका उम्मेदवार रामजी बरालले राजनीतिक स्थायित्वले मात्र देशको अर्थतन्त्र बलियो हुने भएकाले मुलुक समृद्धिको बाटोमा नपुगेसम पाँच दलीय गठबन्धन कायमै रहने बताउनुभयो । पर्यटकीय रुपमा कास्की अत्यन्तै अगाडि छ, यहाँको मेरुदण्ड नै पर्यटन हो, पर्यटनसँगै समृद्धि जोडेर अगाडि बढ्नु पर्छ बरालले भन्नुभयो । कास्की निर्वाचन क्षेत्र नं ३ (१) तर्फ प्रदेश सभा सदस्य उम्मेदवार प्रकाश बरालले पर्यटकीय तथा प्राकृतिक रुपमा गण्डकी प्रदेश सम्भावनै सम्भावना भएको प्रदेश भएकाले पोखरालाई पर्यटकीय हवको रुपमा विकास गर्ने प्रतिवद्धता व्यक्त गर्नुभयो । कास्की निर्वाचन क्षेत्र नं २ (१) तर्फ प्रदेश सभा सदस्यका उम्मेदवार विश्वप्रकाश लामिछानेले फेवा, वेगनास लगायत पोखराका तालहरु विश्व रामसार सूचीमा परेकाले तालहरुको संरक्षणमा हामी सबैको ध्यान जान जरुरी भएकबो बताउनुभयो । यहाँका तालबाट आयआर्जन गर्न सकिने भएकाले फेवाताल वरपर फूट ट्याक बनायौ भने पर्यटकको बसाँइ एक दिन लम्ब्याउन सकिने उहाँले बताउनुभयो ।
गठबन्धनको तर्फबाट प्रदेश सभा सदस्यमा समानुपातिक तर्फकी उम्मेदवार सरस्वती गुरुङले कास्कीको विकासमा सबै पाँच दलहरुको ध्यान जान जरुरी भएको बताउनुभयो ।
नेपाली काँग्रेसका नेता राजबहादुर गुरुङले कास्कीको समग्र विकासका लागि यहाँबाट जितेर जाने उम्मेदवारले आवाज उठाउनु पर्नेमा जोड दिँदै मंसिर ४ हुने निर्वाचनमा पाँच दलीय गठबन्धनका उम्मेदवारलाई मतदान गर्न आग्रह गर्नुभयो । नेकपा माओवादी केन्द्रका नेता त्रिभूवन पौडेलले पर्यटकीय क्षेत्र लेकसाइडलाई थप व्यवस्थित र यहाँका पर्यटक व्यवसायीका मागलाई पाँच दलीय पार्टीका नेताले सम्बोधन गर्ने बताउनुभयो । पर्यटक व्यवसायी टीकाराम सापकोटाले कोरोनाका कारण तीन वर्षदेखि थला परेको पर्यटन क्षेत्रलाई उकास्न राज्यले राहतका कार्यक्रम लयाउन जरुरी भएको बताउनुभयो । पछिल्लो समय बैंकहरुले अप्रत्यासित रुपमा ब्याजदर वृद्धि गर्दा पर्यटन व्यवसायी मारमा परेको सापकोटाले बताउनुभयो । पर्यटन व्यवसायी तथा काँग्रेस नेता गणेशबहादुर भट्टराईको संयोजकत्वमा सम्पन्न उक्त कार्यक्रममा पर्यटन व्यवसायी सोम थापा, संजयकान्त सिग्देल, कमला गिरी लगायतका पर्यटन क्षेत्रले भोग्नु परेका समस्याका बारेमा अबगत गराउनुभएको थियो ।
