भान्साको काममा रमाउनाले तनाव कम हुन्छ

खाना पकाउनु आफैमा कला हो । यसलाई ‘पाककला’ भनिन्छ । जब हामी कुनै मिठो खानेकुरा बनाउने सोच्छौँ त्यसका लागि थरीथरीका सागसब्जी तयार गर्नुपर्ने हुन्छ । पकाउने तरिकाको बारेमा अभ्यास गर्नुपर्ने हुन्छ । यी सबै कामको लागि ती परिकारमा केन्द्रित हुन्छ । जसले गर्दा कतिपय मानसिक तनाव पनि कम हुन्छ ।
खानेकुरा आफूले भनेजस्तै स्वादको बन्छ कि बन्दैन ? आफूले तयार गरेको परिकार खाएर अरुले के भन्छन् ? उनीहरु नयाँ स्वादमा रमाउने हुन् कि होइनन जस्ता कौतुहलताले खुसी पनि दिन्छ ।
भान्सा भनेको हाम्रो खानाको स्रोत हो । खाना भनेको प्राण हो । खाना नै ति सम्पूर्ण स्रोत हुन्, जसले हामीलाई पोषण दिन्छ । त्यसैले कुन खानेकुरा कसरी पकाउने ? कसरी पकाउँदा मिठो हुन्छ ? कसरी पकाउँदा छिटो हुन्छ ? कसरी पकाउँदा स्वस्थ्यकर हुन्छ ? यी ज्ञान खाना पकाउनेसँग हुनुपर्छ ।
हामीले स्वास्थ्य एवं तन्दुरुस्त जीवनका लागि भान्सालाई विशेष महत्व दिनुपर्ने हुन्छ । यदि भान्सामा राम्रो खानेकुरा भएन, पकाउने शैली राम्रो भएन, फोहोर भयो भने त्यसले परिवारलाई रोगी बनाउँछ ।
सधैँ एकैथरी हातले पकाएको खानेकुरा स्वादिलो नलाग्नसक्छ । जब परिवारका सबै सदस्यले आ–आफ्नै ढङ्गले परिकार बनाउँछन्, स्वादमा विविधता आउँछ । खाना पस्कने क्रममा होस् वा खाना खाइरहँदा, एक कसिमको रोमाञ्चकता पनि हुन्छ । त्यसका लागि श्रीमान्ले सागसब्जी पकाइरहँदा श्रीमतीले अचार बनाउन सक्छिन् । यसमा छोराछोरी पनि सहभागी हुन सक्छन् । सबैले मिलिजुली काम गर्दा भान्साको माहौल रमाइलो हुन्छ । साथसाथै खानामा विविधता पनि पाइन्छ ।