काठमाडौं । फिल्म ‘रावायण’ र अभिनेता अनमोल केसीबीचको विवाद सेलाउन नपाउदै कलाकार र निर्माता निर्देशकहरुले आफ्नो टिप्पणी सामाजिक सञ्जालमा जारी राखेका छन् ।
रावायण फिल्ममा काम गर्न १० लाख एडभान्स लिएर फिल्म गर्न नमानेका अनमोल यस प्रकरणमा हिरासतमा पुगेर अहिले हाजिरी जमानीमा बाहिर रहेका छन् । अहिले अनमोलले ‘रावायण’ का निर्माताबाट लिएको १० लाख निर्मताकै बैंक खातामा जम्मा गरिदिएको बताइएको छ ।
अहिले यो विषय फिल्मकर्मी र नेपाली फिल्मका फ्यानहरुबीच चर्चामा रहेका बेला अभिनेत्री पुजा शर्माले सामाजिक संजालमा अनमोलप्रति उनको नाम उल्लेख नगरी असन्तुष्टि व्यक्त गरेकी छन् ।
पूजाले पाथिभरा मन्दिरमा फिल्मको स्क्रिप्ट पुजा गरेको भिडियो र तस्बीर सामाजिक सञ्जालमा राख्दै सो क्षण कहिले नबिर्सिने बताएकी छन् । पुजाले स्क्रिप्ट पथिभारमा पुजा गरेको यसै फिल्म ‘रावायण’ कै भएको खुलेको छ । पुजाको अपोजिटमा अनमोलले काम गर्ने गरी सहमति भएपछि उनले पाथिभरा मन्दिर पुगेर स्क्रिप्टको पुजा गरेको बताइएको छ ।
तर पछि अनमोलले सो फिल्ममा काम गर्न अस्वीकार गरेपछि पूजाले निर्माण समेत गर्ने भनिएको यस फिल्मबाट पछि हटेकी थिइन् । अनमोलले त्यति बेला पनि एडभान्स लिएर फिर्ता गरेका थिए । तर त्यति बेला यस फिल्मको नाम तय भएको थिएन । त्यसपछि निर्देशक सुदर्शन थापाले सोहि स्क्रिप्टलाई ‘रावायण’ नाममा बनाउन अनमोललाई सहमत गराएको बुझिएको छ ।
पुजाले अनमोल लक्षित स्ट्याटसमा लेखेकी छन्:
‘अर्कोतिर भिड छ भन्दैमा सत्य मर्दैन, अझै प्रमाणसहित निर्माण पक्ष ठगीएकोरधोका पाएको देख्दा पनि बोलेन भने अन्याय नै हुन्छ । यो भोली जसलाई पनि पर्न सक्छ । कुराले मात्र होइन, व्यवहारले प्रोड्यूसर बचाऔं । कोही पनि अन्यायमा नपरोस ।’
