गलत तरिकाले उठ्ने बस्ने गर्दा, चोट लाग्दा, खानपानमा गडबडी, गर्भावस्था र अन्य विभिन्न कारणले ढाड दुख्न सक्छ । ढाड दुख्दा मांसपेशी तन्किने, स्नायु अररिने र चर्को पीडा हुने जस्ता समस्याहरु हुन्छन् । एकै ठाउँमा बसिरहँदा समस्या झन् चर्किन्छ । त्यसैले ढाड दुखेको बेलामा हल्काफुल्का काम गरिरहनुपर्छ ।
ढाड मांसपेशी, नसा र हाडहरूको जटिल संरचना हो । यीमध्ये कुनै एकमा समस्या हुँदा पनि ढाड दुख्न थाल्छ । यस्तो ढाड दुखाई सामान्यदेखि लिएर गम्भीर कारणले पनि हुनसक्छ । धेरैजसो शारीरिक कमजोरी भएका अनि शरीरमा भिटामिन डी र क्याल्सियमको कमी बेहोरिरहेका मानिसमा यस्तो समस्या हुन्छ । यस्तो समस्या देखिनेबित्तिकै चिकित्सकको परामर्श लिइहाल्नुस् ।
ढाडको समस्या हुँदा केही घरेलु उपाय पनि अपनाउन सकिन्छ—
मनतातो पानीमा सीधे नून हालेर नुहाउनाले दुखाईमा आराम दिन्छ ।
ज्वानोलाई हल्का भुटेर चपाईचपाई खाने गर्नाले पनि ढाड दुख्नबाट जोगाउँछ ।
सुकेको अञ्जीर, सुकेको खुबानी र पाँचवटा सुकेको आरुबखडा राति सुत्नुअघि चपाएर खाने गर्नाले पनि ढाड दुख्ने समस्या निको हुन्छ ।
एक चम्चा महमा दालचिनीको धूलो एक ग्राम हालेर बिहान बेलुका दिनमा दुईचोटि खाँदा आराम मिल्छ ।
शरीरमा क्याल्सियमको कमी पूरा गर्नका लागि दुग्धजन्य पदार्थ र क्याल्सियमले भरपूर आहार खानुपर्छ । दैनिक दुई गिलास दूध पिउने अनि हरेक बिहान आधा घन्टा घाममा बस्ने गर्नाले ढाड दुख्ने समस्याबाट मुक्ति पाउन सकिन्छ । त्यस्तै गरी तातो पानीले सेक्दा पनि पीडाबाट केही हदसम्म मुक्ति पाइन्छ ।
