काठमाडौं । प्रहरीको केन्द्रीय अनुसन्धान ब्युरो (सीआईबी) ले चिकित्सकका एसएलसी र प्लसटूको शैक्षिक प्रमाणपत्र नक्कली पेस गरी डाक्टर बनेकाहरुको खोजी गर्न फोक्सट्रोट चार्ली अप्रेसन चलाएको छ । जसमा आठजना चिकित्सक पक्राउ परेका थिए । कांग्रेस सांसद सुनिल शर्मा पनि यही अप्रेसनमा पक्राउ परेको बताइएको थियो । तर सर्वोच्च अदालतले शर्मालाई रिहा गर्न आदेश दिएपछि उनी थुनामुक्त भएका थिए ।
गृहमन्त्री नारायणकाजी श्रेष्ठको दबाबमा कांग्रेस सांसद पक्राउ परेका थिए । अहिले सीआईबीको सो अप्रेसन गृहमन्त्री श्रेष्ठकै लागि ठूलो झापड भएको छ । नक्कली शैक्षिक प्रमाणपत्र प्रकरणमा पक्राउ परेका डा। रञ्जितकुमार यादव थुनामुक्त भएका छन् । नक्कली डाक्टरविरुद्ध अभियान चलाएको सीआईबीले यादव सक्कली नै भएको थाहा पाएपछि थुनामुक्त गरेको हो । नेपाल मेडिकल काउन्सिलले यादवको प्रमाणपत्रको प्रतिलिपिसहितको पत्र सीआईबीलाई सोमबार पठाएको थियो। काउन्सिलको उक्त पत्रपछि सीआईबीले उनलाई छाडेको हो ।
नेपाल चिकित्सक संघले डा।रञ्जीतकुमार यादवलाई पक्राउ गर्ने सीआईबी र विवरण उपलव्ध गराउने नेपाल मेडिकल काउन्सिलका अधिकारीहरुमाथि अविलम्ब छानविन गरी कडा कारवाही गर्न माग गरेको छ । काउन्सिलले उपलव्ध गराएको विवरणको आधारमा सीआईबीले नक्कली चिकित्सकको आरोपमा डा। यादवलाई साउन २५ मा नियन्त्रणमा लिएको थियो । प्रारम्भिक अनुसन्धानबाटै उनी सक्कली चिकित्सक भएको ठहर भएपछि आइतबार बेलुका सीआईबीले रिहा गरेको थियो ।
संघले सोमबार जारी गरेको विज्ञप्तीमा यादवलाई पक्राउ गरी मानसिक तनाव सिर्जना गरेको, मानमर्दन गरी न्यूनतम मानव अधिकारको समेत हनन गरिएको उल्लेख छ । उसले काउन्सिल जस्तो नियमनकारी निकायबाट चिकित्सकहरुको गलत विवरण सिआईबीलाई उपलव्ध गराउनु तथा कुनै पनि सरोकार नभएका चिकित्सकलाई नक्कली भनि फक्राउ गरेर समाजमा त्रसिद बातावरणको सिर्जना गर्ने बिरामी र चिकित्सक बीचको सम्वन्धमा कमी लयाउने काम गरेको आरोप लगाएको छ ।
