काठमाडौं । प्रहरी र गुन्डा नाइकेबीचको साँठगाँठले उपत्यकमा प्रहरी गुन्डागर्दी बढ्न थालेको छ । ठमेलका क्लबहरुमा गएर पैसा माग्दै कुटपिटका घटना त बाहिर आइसकेका छन् । केही घटना बाहिर आएपछि धेरै घटना भने भित्रै गुपचुप बनाइने गरेको छ ।
ओमनिया क्लबमा भएको कुटपिटमा प्रहरीले युवराज गुरुङसहितका ६ जनालाई पक्राउ गरेको छ । सुरुमा प्रहरीले घटनामा चासो नदिएकोमा कुटपिटको सिसिक्यामेरा फुटेज बाहिरिएपछि मात्र प्रहरीको चासो बढेको थियो ।
यो घटनाका नाइके युवराज पहिला कुमार घैंटे समूहमा आबद्ध थिए । घैंटे इन्काउन्टरमा मारिएपछि उनी बुलेटप्रुफ ज्याकेट लगाएर हिड्थे । अहिले कांग्रेस नेताहरुको संरक्षणमा फेरि उनले गुन्डागर्दी सुरु गरेका हुन् । हालका अर्थमन्त्री प्रकाशशरण महत लगायतले उनलाई संरक्षण गर्दै आएको स्रोत बताउँछ ।
प्रहरीकै संरक्षणमा काभ्रेली समूहले पनि ठमेलमा आतंक मच्चाउन थालेको छ । गत २५ साउनमा काभ्रेली समूहले पनि एक क्लबमा कुटपिट गरेको थियो । जसमा तीन जनालाई प्रहरीले पक्राउ समेत गरेको थियो । तर, सोह्रखुट्टे वृत्तमा सेटिङमा मुद्दा नचलाई छाडिदिएको छ ।
स्रोतका अनुसार सोह्रखुट्टे वृत्तका डिएसपी गणेश बमले कांग्रेस नेताहरुको सिफारिसमा छाडेका हुन् । पक्राउ पर्नेमा तेमाल गाउँपालिकाका एक वडाअध्यक्ष समेत थिए । उनीहरुलाई छाड्दा आर्थिक चलखेल भएको वृत्तका एक प्रहरी बताउँछन् ।
डिएसपी बम कांग्रेस नेताहरुको सिफारिसमा त्यहाँ पुगेका हुन् । उनको एक वर्षको अवधि पुगिसकेको छ । जसकारण पछिल्लो समय जसरी पनि कमाउने अभियानमा लागेका छन् । नियमित पैसा बुझाउनेलाई संरक्षण गर्ने र अरुको हकमा दुःख दिने उनको नीतिबाट व्यवसायी हैरान भइरहेका छन् ।
सोह्रखुट्टेसहित दरबारमार्ग, बौद्ध, गौशाला, महाराजगञ्जलगायत वृत्तका डिएसपीको एक वर्ष पुगिसकेको छ । ती वृत्तमा पछिल्लो समय अनियमितता बढेको छ । सरुवाको समय आउन लागेपछि डिएसपीहरू कमाउनतर्फ लागेका हुन् ।
