गोरखा । जिल्लाको शहिदलखन गाउँपालिका वडा नम्बर ३ मनकामनामा जन्ती बोकेको जीप दुर्घटना हुँदा ५ जनाको मृत्यु भएको छ ।
सहिद लखन गाउँपालिका ३ मनकामनामा स्थित सिलिङ र ढाँडवारी बिचमा पर्ने अमल डाँडा भन्ने स्थानमा मा शुक्रबार बिहान करिब ३ः३० बजे जीप दुर्घटना हुँदा पाँच जनाको मृत्यु भएको प्रहरीले बताएको छ । घटनामा १४ जना घाइते भएका छन् ।
दुलहा दुलही र जन्ती बोकेर कोटगाउँबाट पोखरीडाँडा जाँदै गरेको प्रदेश ३–०१–०२३ च २४२७ नम्बरको जीप आज बिहान तीन बजे दुर्घटना भएको प्रहरीले जनाएको छ । जिपमा १९ जना सवार रहेका थिए ।
सडकबाट झण्डै दुईसय मिटर तल खसेर जीप दुर्घटना भएको घटनास्थलबाट डिएसपी लिलाराज लामिछानेले जानकारी दिए । घटनास्थलमा स्थानीय सहित नेपाली सेना र सशस्त्र प्रहरीको टोली पुगेर उद्धार गरेको छ । घाइतेहरूको आँवुखैरेनी अस्पतालमा उपचार भइरहेको छ ।
