काठमाडौं । रुसी राष्ट्रपति भ्लादिमिर पुटिनले बेलारुसलाई आणविक हतियार दिएको स्वीकार गरेका छन् ।
रुसको अन्तर्राष्ट्रिय आर्थिक फोरम ‘एसपीआईआईएफ’ मा बोल्दै पुटिनले आणविक हतियार दिएको स्वीकार गरेका हुन् । रुसी राष्ट्रपतिले आफ्नो यो स्वीकारोक्तिलाई पश्चिमा राष्ट्रले चेतावनीका रुपमा बुझ्नुपर्नेसमेत बताएका छन् ।
पुटिनले बेलारुसमा आणविक हतियारको आपूर्ति पहिलो चरणको भएको बताउँदै अर्को चरणमा पनि पठाउन सकिने बताए । उनले यसलाई आफ्नो मित्रराष्ट्रप्रति गरिएको रणनीतिक सामरिक सहयोगका रुपमा व्याख्या गरे । पुटिनकाअनुसार अब युक्रेन विरुद्धको युद्धमा आफ्नो तर्फबाट आणविक हतियार प्रयोग गर्नुपर्ने दुविधाबाट रुस मुक्त भएको छ ।
यसअघि बेलारुसका राष्ट्रपति अलेक्जेन्डर लुकासेन्कोले रुसबाट आणविक हतियार प्राप्त भएको र युक्रेन विरुद्धको युद्धमा प्रयोग गर्न सकिने चेतावनी दिएका थिए ।
