काठमाडौं । राष्ट्रिय स्वतन्त्र पार्टीका सभापति रवि लामिछानेले आफ्नो दल एमालेसँग बढी कम्फोर्टेबल भएको भन्ने भाष्य गलत भएको बताएका छन् । शुक्रबार प्रतिनिधिसभा सदस्यको पद तथा गोपनीयताको शप लिएपछि सञ्चारकर्मीहरूसँग कुराकानी गर्दै उनले विगतमा सरकारमा रहँदा यस्ता चर्चा भए पनि त्यो गलत भएको भन्दै खण्डन गर्न चाहन्छु भनेका छन् ।
उनले आफ्नो दलले निश्चित एजेन्डाका आधारमा मात्र कुनै दलसँग सहकार्य गरिरहेको बताउँदै उनले कुनै एक दलसँग नजिक नरहेको बताए । ‘हामी सरकारमा रहँदा पनि पहिलोपटक मन्त्री बोलाउने दल हौं । सरकारबाट बाहिरिए पनि समर्थन गरेका थियौं । त्यसैले एमालेसँग मात्र नजिक रहेको भन्ने कुरा सत्य होइन,’ उनले भने ।
लामिछानेले तत्काल आफ्नो पार्टी सरकारमा नजाने पनि प्रस्ट पारे । आफूहरूले चुनावमा जाँदा भ्रष्टाचार छानबिनको कुरा उठाएको र अहिले सरकारले त्यसलाई प्रमुख एजेन्डा नबनाएकाले समर्थन जारी राख्ने कि फिर्ता लिने भन्ने विषयमा संसदीय दल र केन्द्रीय समितिको संयुक्त बैठक बसेर निर्णय लिने उनको भनाइ थियो । उनले आफूलाई प्रधानमन्त्री प्रचण्डले चुनाव जितेकोमा बधाई दिन फोन गरेको तर सरकारमा सामेल हुने विषयमा कुनै कुरा नभएको दाबी गरे ।
