काठमाडौं । काठमाडौंस्थित त्रिभुवन अन्तर्राष्ट्रिय विमानस्थलबाट उड्ने बित्तिकै इन्जिनमा समस्या देखिएको फ्लाई दुबईको विमान दुबई अन्तर्राष्ट्रिय विमानस्थलमा सुरक्षित अवतरण गरेको छ ।
काठमाडौं विमानस्थलबाट उडेको केही समयभित्रै उक्त विमानको दाया इन्जिनमा आगो लागेको थियो ।
विमानलाई आकस्मिक अवतरण गराउने तयारी भइरहेको अवस्थामा चालक दलले काठमाडौंको आकाशमा विमानलाई केही समय होल्ड गर्दै आगो नियन्त्रणपछि गन्तव्यतर्फको उडानलाई निरन्तरता दिने निर्णय लिएको थियो ।
उडान नम्बर ५७६ एफजेड रहेको उक्त विमान स्थानीय समयअनुसार मंगलबार बिहान १२ : ११ बजे सुरक्षित रुपमा अवतरण गरेको दुबई अन्तर्राष्ट्रिय विमानस्थलले जनाएको छ ।
फ्लाई दुबईले काठमाडौं विमानस्थलबाट उड्ने बित्तिकै विमानमा चरा ठोक्किएको दाबी गरेको छ । उक्त विमान कम्पनीका प्रवक्तालाई उद्धृत गर्दै दुबई सरकारको मिडिया कार्यालयको फेसबुक पेजमा विमानमा चरा ठोक्किएको उल्लेख गरेको छ ।
काठमाडौं विमानस्थलबाट सोमबार राति ९ बजेर २१ मिनेटमा उडान भरेको विमानबाट ठूलो आवाज आएको थियो भने लगत्तै दाया इन्जिनमा आगो लागेको देखिएको थियो ।
१ सय ६७ यात्री सवार उक्त विमानमा ५० जनाभन्दा बढी नेपाली पनि थिए ।
