काठमाडौं – जनता समाजवादी पार्टी (जसपा) का अध्यक्ष उपेन्द्र यादव बारा–२ मा उम्मेदवार भएका छन् । तर टुरिस्ट मात्र होइन, हरूवा उम्मेदवारको आरोपसहित बारा २ को चुनावी मैदानमा रहेका यादवका लागि सीके राउत निकै भारी पर्ने देखिएको छ । त्यसमाथि रवि लामिछानेको लहर थपिँदा यादवलाई संकट पर्न सक्छ ।
के के छन् त चुनौती ?
राउत सक्रीय
जनमत पार्टी ४ मंसिरको चुनावसँगै नयाँ शक्तिको रूपमा उदाएको छ । सीके राउतको व्यक्तिगत प्रभावका कारण मधेशमा जनमत लोकप्रिय बन्दैछ । त्यसमाथि मधेशमा बलियो शक्ति जनता समाजवादी पार्टी (जसपा) लाई काउन्टर गरेर आइरहेका कारण पनि उसको प्रभाव विस्तारित हुन थालेको हो । उपेन्द्र यादवलाई आफ्नो प्रतिस्पर्धी ठानेका राउतले सप्तरी–२ मा तिनै यादवलाई पराजित गरेपछि राउत बलियो देखिएका छन् । त्यो प्रभाव बारा–२ मा पनि देखिन सक्ने अनुमान गरिएको छ ।
गठबन्धनभित्रै असहयोग
यादवलाई उम्मेदवार बनाउन सत्ता गठबन्धन सहमत भएको छ । साझा उम्मेदवारको रूपमा यादव चुनावी अभियानमा सक्रिय छन् । तर, गठबन्धनमा रहेको माअोवादी, कांग्रेस मात्र होइन, एकीकृत समाजवादी पनि असहमत देखिएको छ । कांग्रेसले मधेश प्रदेशमा मुख्यमन्त्री दावी गरिरहेको छ । मधेश प्रदेशका सभापति कृष्ण यादवले पटकपटक उक्त कुरा सार्वजनिक गरिरहेका छन् ।
त्यसबाहेक, एकीकृत समाजवादी अहिले रुष्ट देखिएको छ । एमालेका उम्मेदवार पुरुषोत्तम पौडेलले यसअघि चुनावमा बारा ४ मा उम्मेदवार भएका एसका किसान श्रेष्ठलाई सहयोग गरेका थिए । अहिले किसान श्रेष्ठ तिनै पौडेलको पक्षमा लाग्ने बारामा चर्चा हुन थालेको छ । श्रेष्ठलाई मन्त्री नबनाएपछि अहिले गठबन्धनप्रति रुष्ट रहेका छन् । त्यो रुष्टतताको असर पनि यादवमाथि पर्न सक्ने अनुमान गरिएको हो ।
यादवविरुद्धको मत
बारा २ यादव समुदायको प्रभाव रहेको क्षेत्र हो । तुलनात्मक रूपमा यादवहरूको प्रभाव रहेको यो क्षेत्रमा रामसहाय यादवको बलियो प्रभाव पनि थियो । बाराकै यादवलाई उपेन्द्र यादवले विभिन्न अवसर प्रदान गरेका छन् ।
रामसहाय यादव उपराष्ट्रपति निर्वाचित भए । सरोज यावदलाई मधेश प्रदेशको मुख्यमन्त्री बनाएका छन् । अनि पार्टीको प्रदेश अध्यक्ष पनि बाराकै रामबाबु यादवलाई बनाएका छन् । त्यस कारण यादवविरुद्धको मत पनि यो क्षेत्रमा पोखिन सक्ने विश्लेषण भइरहेको छ ।
टुरिस्ट उम्मेदवार
उपेन्द्र यादव बारा–२ का लागि पर्यटक उम्मेदवार मात्र होइनन्, हरूवा उम्मेदावर पनि हुन् । मंसिरमा सप्तरी–२ मा पराजित भएका यादव अहिले चुनाव जित्नका लागि बारा २ मा आएपछि स्थानीय रुष्ट बन्न सक्छन् । टुरिस्ट उम्मेदवारको आरोप खेप्नुपर्नेछ ।
स्थानीय र अन्य उम्मेदवारले यो आरोप लगाउँदा यादवले जवाफ दिन सक्ने छैनन् । यद्यपि, यो क्षेत्रमा यादव नेताहरूलाई प्रशस्त अवसर दिएको सम्म चाहिँ बन्न सक्छन् । त्यसबाहेक यादव समुदायको नेता आफू भएको मनोविज्ञान उपेन्द्र यादवले सिर्जना गर्न सक्छन् । त्यसको प्रभाव पनि उनका लागि सकारात्मक पर्न सक्छ, जसले गर्दा टुरिष्ट उम्मेदवारको क्षतिपूर्ति गर्न सक्छन् ।
रविको लहर
सीके राउतको प्रभावजस्तै राष्ट्रिय स्वतन्त्र पार्टीका सभापति रवि लामिछानेको लहर पनि निकै रहेको छ । त्यो लहर छोप्न रमेश खरेल काठमाडौं छोडेर बारा–२ मा उम्मेदवार हुन पुगेका छन् । पर्सामा प्रहरी प्रमुख भएर काम गरेको साइनो जोडेर खरेल बारा–२ मा उम्मेदवार हुन गएका हुन् । पुरानो प्रभावलाई पुनर्ताजगी गराए रवि लहर थपिँदा चुनाव जित्न सकिने आकलन खरेलको रहेको छ ।
