काठमाडौं । केही समयअघि टिकटकमा निकै भाइरल भएको गीत ‘हैजिरा फूल्याको छैक्या’ सार्वजनिक हुने भएको छ ।
सुदूरपश्चिमका मुख्यमन्त्री कमलबहादुर शाह र संघीय सरकारका संस्कृति, पर्यटन तथा नागरिक उड्डयानमन्त्री सुदन किरातीले राष्ट्रिय नाचघर जमलमा शुक्रबार साँझ यो गीत सार्वजनिक गर्नेछन् ।
हैजिरा फैल्याको छैक्या बोलको गीतका टुक्काहरु केही समय अघि टिकटकमा निकै भाइरल भएका थिए । तर, यो गीतका टुक्का मात्रै सुन्न पाएका स्रोताले अब पूरा गीत हेर्न र सुन्न पाउने भएका हुन् ।
सुदूरपश्चिमको कलासंस्कृति र पर्यटन प्रवर्द्धनका लागि ‘हैजिरा फूल्याको छैक्या’ बोलको देउडा गीत बनेको हो । यो गीतमा सुदुरपश्चिम प्रदेशका नौ वटै जिल्लालाई समावेश गरिएको छ र त्यसबारे जानकारी दिइएको छ ।
यस देउडा गीतले सुदूरपश्चिमको कलासंस्कृतिलाई समेत उजागर गरेको छ । गीतमा कैलाली र बर्दियाको सीमानाका रुपमा रहेको कर्णाली पुललाई विशेष प्रथमिकता दिइएको छ ।
यो गीतका रचनाकार चिसापानी एड्भेन्चर रिर्सोटका सञ्चालक तपेन्द्र रावल हुन् भने चर्चित देउडा गायक चक्र बम, रेखा जोशीले यसमा स्वर दिएका छन् । साथै चर्चित बाल गायीका पूजा देवकोटा र रचनाकार तपेन्द्र रावलको समेत स्वर यस गीतमा रहेको छ ।
करीब दुई वर्षअघि नै रेर्कड गरिएको यस गीतको म्युजिक भिडियोको छायाँकनको काम सम्पन्न भएको छ । सुदुरपचिमको प्रदेशको प्रवेशद्वार चिसापानी कर्णाली पुल, कैलालीको घोडाघोडी ताल, त्रिवेणी धाम, कञ्चनपुरको वेदकोट ताल, अछामको रामारोसन, पञ्चदेवल, डडेलधुराको उग्रतारा मन्दिर र खप्तड क्षेत्रलगायत नौ वटै जिल्लाका प्रमुख पर्यटकीय स्थलहरुमा म्युजिक भिडियो छायाँकन गरिएको छ । साथै भारतको मुम्बईंमा गीतको म्युजिक भिडियो छायाँकन गरिएको छ ।
रचनाकार एवं गायक तपेन्द्र रावलको निर्देशनमा यस गीतको छायाँकन गरिएको हो । रावलको समेत अभिनय रहेको यस गीतमा अनु खड्का, रस्मी कुँवर, शीखा मल्ल लगाएतका कलाकारको नृत्य रहेको छ ।
कोरोना कहरका कारण समग्र पर्यटन क्षेत्रमा देखिएको मन्दीले सुदूरको पर्यटन व्यवसायलाई समेत नराम्ररी थलापारेकाले त्यहाँको पर्यटन प्रवर्द्धनका लागि गीत तयार पारीएको रचनाकार रावलको भनाई छ ।
सुदूरपश्चिमको मौलिक भाषामा बनको यो गीतबाट उठेको रकमले विदेशी पर्यटकको समेत मन जित्न निकट भविष्यमा चिसापानी कर्णालीमा चारैतिर मुखाकृति भएको गौतमबुद्धको शालीक समेत स्थापना गर्ने योजना छ ।
