काठमाडौँ । काठमाडौँ उपत्यका सहित पहाडी जिल्लाहरूमा सोमबार होली मनाइँदै छ । उपत्यका र पहाडी जिल्लाहरूमा सार्वजनिक बिदा छ ।
काठमाडौँ प्रहरीले फागु पूर्णिमामा हुने भिडभाडपूर्ण कार्यक्रममा सुरक्षा दिने गरी सुरक्षा योजना लागु गरेको छ । होली खेल्ने नाममा जबरजस्ती लोला हान्न निषेध गरिएको जिल्ला प्रहरी परिसर काठमाडौँका एसएसपी दान बहादुर कार्कीले बताए ।
इच्छा विपरीत रंग दल्ने र लोला हानेर दुर्व्यवहार गरेको भेटिए पक्राउ गरिने एसएसपी कार्कीले बताए । उनले भने–‘इच्छा विपरीतको क्रियाकलाप बारे कसैले उजुरी गरेमा आरोपीलाई अभद्र व्यवहार मुद्दा चलाउँछौँ ।’ अबिर दल्ने कुरामा पनि जबरजस्ती गर्न नहुने कार्कीले बताए । होलीको नाममा जबरजस्ती लोला हान्नेलाई अभद्र व्यवहार सम्बन्धी कसुरमा मुद्दा चलाउने अधिकार प्रहरीलाई छ । सो मुद्दामा १ वर्ष कैद र १० हजार सम्म जरिवाना हुने कानुनी व्यवस्था छ ।
काठमाडौँ जिल्लाका विभिन्न सार्वजनिक ठाउँमा होली खेल्ने कार्यक्रम आयोजना गरिएको छ । घोषित रूपमा डिजे मार्फत म्युजिक बजाउने कार्यक्रममा जिल्ला प्रशासन कार्यालयले मादक पदार्थको विज्ञापन गर्न रोक लगाएको छ । जिल्ला प्रशासन कार्यालय काठमाडौँले संवेदनशील ठाउँमा डिजे नबजाउन भनेको छ । वसन्तपुर, माइतीघर र स्थानीय क्लबहरूले होली खेल्ने कार्यक्रम राखेका छन् । कतिपय सञ्चार गृहहरूले आफ्नो कार्यालयमा होली खेल्ने कार्यक्रम राखेका छन् ।
