पोखरा, १८ फागुन । देशका विभिन्न स्थानमा फरकफरक लय र भाकामा गाइने भजन चुड्का एकै मञ्चमा गाइने भएको छ । विभिन्न प्रकारका लोपोन्मुख भजन चुड्काको संरक्षणका साथै युवा पुस्तालाई त्यस्ता भजन चुड्काका बारेमा जानकारी दिने उद्देश्यले देशैभरिका भजन चुड्का एकै मञ्चमा गाइने भएको हो । एकै मञ्चमा देशको पूर्वदेखि पश्चिमसम्मको भजन चुड्का गाइने कार्यक्रम नेपालमै पहिलो पटक भएको बताइएको छ ।
राष्ट्रिय लोकभजन चुड्क संरक्षण प्रतिष्ठान नेपालले बिहीबार पोखरामा पत्रकार सम्मेलन गरी त्यस्तो जानकारी दिएको हो । पछिल्लो पुस्तामा लोकसंस्कृति हराउँदै गएका कारण उक्त संस्थाले यही फागुन २५ देखि चैत २ गतेसम्म पोखरामा भजन महोत्सव तथा राष्ट्रव्यापी लोक भजन प्रतियोगिता संचालन गर्न लागेको हो ।
संस्थाका अध्यक्ष प्रजापति पराजुलीले प्रतिस्ठानको केन्द्रीय कार्यालय भवन निर्माण सयोगार्थ पोखरामा ज्ञान महायज्ञ, भजन महोत्सव तथा राष्ट्रव्यापी लोकभजन प्रतियोगिता आयोजना गर्न लागिएको बताउनुभयो । हाम्रा लोक विश्वास, लोक परम्परा र लोक संस्कृतिमा अब नयाँ जागरण ल्याउन आवश्यक भएको कुरा उहाँले औंल्याउनुभयो ।
कार्यक्रमको मुख्य उद्देश्य समाजमा अध्यात्मको महत्व स्थापित गराउनु, हाम्रो सनातन धर्मका व्यवहारिक एवं बैज्ञानिक महत्वबारे प्रकाश पार्नु, लोपोन्मुख बालन। हनुमान लीला, भजन चुड्का लगायत धार्मिक गीतहरुको संरक्षण गर्नु, नयाँ पुस्तालाई लोकसंस्कृतिप्रति आकर्षित गर्ने, देशका विभिन्न् जिल्लामा फरकफरक शैलीमा गाइने भजनचुड्का लय, भाका, भेषभूषा लोकबाजाको प्रदर्शन गराउनुको साथै संग्रह गरिने रहेको जानकारी अध्यक्ष पराजुलीले दिनुभयो ।
भजन चुड्का प्रतियोगितामा सहभागी हुन हाल ४६ जिल्लाबाट सम्पर्क भइसकेको र अन्य जिल्लाबाट पनि हुने विश्वस आयोजक संस्थाले लिएको छ । भजन चुड्का प्रतियोगितामा एउटा समुखबाट १०– २५ जना सम्म सहभागी हुन सक्ने जानकारी सो अवसरमा दिइएको थियो । भजन चुड्का महोत्सवसँगै हुने ज्ञान महायज्ञमा विशिष्ठ बैज्ञानिक तथा आध्यात्मिक व्याख्याता चैतन्यकृष्ण प्रभुले भागवत् वाचन गर्ने कार्यक्रम रहेको जानकारी अध्यक्ष पराजुलीले दिनुभयो । महोत्सव सम्पन्न गर्नका लागि अनुमानित खर्च ३५ लाख रुपैयाँ र आम्दानी एक हरोड रुपैयाँ हुने विश्वास गरिएको छ ।
भजन चुड्का प्रतियोगिता अन्तरगत प्रथम हुने समुहलाई ५१ हजार, द्धितीय हुने समुहलाई ३१ हजार, तृतीय हुने समुहलाई २१ हजार, सान्त्वना हुने समुहलाई ११ हजार रुपैयाँ पुरस्कारको व्यवस्था गरिएको छ भने उत्कृष्ट नृत्यलाई सात हजार पाँच सय, उत्कृष्ट झाँकीलाई सात हजार पाँच सय, उत्कृष्ट भेषभूषालाई सात हजार पाँच सय र अनुशासनलाई समुहलाई सात हजार पाँच सय रुपैयाँको पुरस्कार प्रदान गरिने जानकारी सो अवसरमा दिइएको छ ।
भजन चुड्का प्रतियोगितामा एक सय भन्दा वढी समुह सहभागी हुने विश्वास आयोजक संस्थाले गरेको छ । एकै जिल्लाका तीन चार समुहपनि प्रतियोगितामा सहभागी हुन सक्ने छन् । प्रतियोगितमामा सहभागी हुन प्रति समुहले एक हजार पाँच सय रुपैयाँ शुल्क तिर्नु पर्ने हुन्छ ।
