काठमाडौँ— सन्तोष प्याकुरेलको नेतृत्वमा राष्ट्रिय शैक्षिक परामर्श संघको नयाँ कार्यसमिति चयन भएको छ । संघको काठमाडौँमा सम्पन्न चौथो वार्षिक साधारण सभाले नयाँ कार्यसमिति सर्वसम्मत चयन गरेको हो ।
कार्यसमितिको उपाध्यक्षमा भुपेन्द्र सिटौला र रमण कोइराला चयन भएका छन् भने महासचिवमा दिपक कोइराला चुनिएका छन् ।
त्यस्तै सचिवमा प्रद्युम्न बोगटी र सुभेन्द्र थापा, कोषाध्यक्षमा रबिन्द्र थापा तथा सदस्यहरुमा सुर्य पोख्रेल, प्रतिक्षा श्रेष्ठ, त्रिलोचन अधिकारी, कमला बस्नेत, ध्रुब थापा, केशब सिम्खडा र अशोक भण्डारी निर्विरोध निर्वाचित भएका छन् ।
साधारण सभाले वार्षिक प्रगति प्रतिबेदन, वार्षिक आर्थिक प्रतिबेदन र आगामी कार्य योजना पारित गरेको छ । कार्यक्रमको उद्घाटन नेपालको लागि अष्ट्रेलियन राजदुत फेलिसिटी भोल्कले गरेका थिए । कार्यक्रममा नेपाल अभिभावक महासंघका अध्यक्ष सुप्रभात भण्डारी, ब्रिटिस काउन्सिलका प्रतिनिधि लगायत विभिन्न शैक्षिक परामर्श संघका प्रतिनिधि रहेका थिए ।
कार्यक्रमलाई सम्बोधन गर्दै अतिथिहरुले नयाँ कार्यसमितिलाई सफलताको शुभकामना दिएका थिए । कार्यक्रममा अस्ट्रेलियन कलेजहरु जब ट्रेनिङ ईन्टिच्यूट, कि टु लर्निङ कलेज, किङस्टन ईन्टिच्यूट अस्ट्रेलिया, ब्लु लोटस कलेज, एएबिटि कलेज, एससिसियम कलेज, सिआइएम कलेज, स्टिडि ग्रुप, एसएबिटी कलेज, म्याक्यालन कलेज, भिआइइ कलेज लगायतका प्रतिनिधिको उपस्थिति रहेको थियो । एडभेन्टास, एजेन्टिक्स, सिच्यूवान एयर लाइन्स आदि संस्थाका प्रतिनिधिहरुको उपस्थिति रहेको थियो । राष्ट्रिय शैक्षिक परामर्श संघ शैक्षिक परामर्श संस्थाहरुको छाता संगठन हो ।
संघले सामाजिक दायित्व अन्तर्गत विपत्तिमा परेकाहरुलाई सहयोग गर्ने, विदेशमा अध्ययनमा गएका विधार्थीहरुलाई अप्ठ्यारो परिस्थितिमा सहयोग तथा सहजिकरण गर्ने, विद्यार्थी तथा अभिभावकसँग वैदेशिक अध्ययन सम्बन्धि अन्तक्रिया गर्ने लगायत कार्य गर्दै आएको छ ।
त्यसैगरी, संघले आफ्ना सदस्य संस्थालाई तालिम दिने, अन्तक्रिया गर्ने, वैदेशिक कलेज तथा त्यसका प्रतिनिधिको विकृति विरुद्घ ससक्त रुपमा आवाज उठाउने कार्यलाई निरन्तरता दिंदैआएको छ । स्थापनाको छोटो समयमानै धेरै शैक्षिक परामर्श व्यवसायी संघमा आवद्ध भैसकेका छन् ।
