पोखरा, ७ फागुन । पृथ्वीराजमार्ग अन्तरगत पोखरा–२६ लेखनाथको डाँडाकोनाकमा बस दुर्घटना हुँदा चालकसहित ४९ जना यात्रु घाइते भएको छन् ।
लेखनाथको ढुंगेपाटनस्थित पोखरा विश्वसविद्यालय नजिकैबाट पोखरातर्फ आउँदै गरेको ग १ख ६७४७ नं को लेखनाथ मिनी माइक्रोबस आइतबार दिउँसो दुर्घटनग्रस्त भएको हो ।
सडकबाट करिब १० मिटर तल खोल्सामा उक्त बस खस्दा ४९ जना यात्रु घाइते भएका हुन् । जिल्ला प्रहरी कार्यालय कास्कीका प्रहरी निरीक्षक ज्ञानबहादुर खड्काका अनुसार घाइते सबैको उद्धार गरी अस्पताल पठाइएको छ ।
दुर्घटनामा परी घाइते मध्ये ४० जनाको पश्चिमाञ्चल क्षेत्रीय अस्पताल रामघाट, ५ जनाको गण्डकी मेडिकल कलेज नयाँबजार, २ जनाको फिस्टेल अस्पताल गैहपाट र २ जनको मेट्रोसिटी अस्पताल सृजनाचोकमा उपचार भइरहेको जानकारी प्रहरी निरीक्षक खड्काले दिनुभयो । घाइते मध्ये तीन जनालाई गम्भीर चोट देखिएको बताइएको छ ।
दुर्घटनामा पोखरा विश्वविद्यालयमा अध्ययरत केही विद्यार्थी पनि रहेको जानकारी प्रहरीले दिएको छ । भोलि हुने पोखरा विश्वविद्यालयको दीक्षान्त समारोहमा भागलिन विद्यार्थी विभिन्न जिल्लाबाट पोखरा आएका छन् ।
