पोखरा, ३ फागुन । नेकपा (एकीकृत) समाजवादीका अध्यक्ष माधबकुमार नेपालले राजनीतिक सहमतिबाट नै राष्ट्रपति छान्नुपर्ने बताउनुभएको छ ।
समाजवादी प्रेस संगठन कास्कीद्धारा बुधबार पोखरामा आयोजित पत्रकार भेटघाट कार्यक्रममा बोल्दै अध्यक्ष नेपालले भन्नुभयो ‘लोकतान्त्रिक गणतन्त्रात्मक संविधानको रक्षा गर्ने राष्ट्रपतिको खोजी भइरहेको छ ।’
नेकापा एमालेसँग सभामुख, राष्ट्रिय सभा अध्यक्ष हुँदाहुँदै पुन राष्ट्रपति पनि सुम्प्यौँ भने देश बर्वाद हुने भनाई नेपालको थियो । ‘एमाले अध्यक्ष केपी ओलीका अघिल्ला प्रतिगमनकारी गतिविधिका कारणले पनि राजनीतिक सन्तुलन कायम राख्न राष्ट्रपति एमालेलाई दिन हुँदैन।’ अध्यक्ष नेपालले भन्नुभयो । नेकपा एमालेलाई राष्ट्रपति दिने पक्षमा समाजवादी पार्टी नरहेको र सबैले स्वीकार गर्न सक्ने व्यक्ति राष्ट्रपति बनाइनु पर्ने भनाई पनि उहाँको छ । सहमती नभएसम्म आफ्नो पार्टीले राष्ट्रपतिको उम्मेदवार नदिने भनाई उहाँको छ ।
सबैलाई मान्यहुने राष्ट्रपति चुन्न सकिन्छ कि भनेर प्रधानमन्त्री प्रचण्ड लाग्नु भएको छ, हेरौ त्यो प्रयास सफल हुन्छ कि हुँदैन । प्रचण्डलाई शेरबहादुरले प्रधानमन्त्री दिन्छु भन्दै हुनुहुन्थ्यो के कारणले उता जानुभयो त्यो खोजीकै बिषय भएको भनाई अध्यक्ष नेपालको छ ।
‘वर्तमान सरकार लोकतान्त्रिक र प्रतिगमनकारी शक्ति मिलेर बनेको खिचडी हो, यसले लोकतान्त्रिक गणतन्त्रको पक्षमा काम गर्छ भन्ने विश्वास आफूलाई छैन,देशमा राजनीतिक तरलता देखिएको छ, यो सरकार लामो समयसम्म चल्ने छाट मैले देखेको छैन,’ अध्यक्ष नेपालले भन्नुभयो । राजनीतिक अवस्था कता जाने हो, हैँदै जाउँ नेता नेपालले भन्नुभयो ।
गणतन्त्रका पक्षपोषक र बिरोधी पनि सरकारका भएकाले सरकारले संविधान र जनताको हितमा काम गर्न सक्दैन, । मुलुक प्रतिगमनको दिशातर्फ जान नदिन हामी सक्दो भूमिका खेल्छौ, नेकपा एकीकृत समाजवादी पार्टी वर्तमान सरकारमा सहभागी नहुने कुरा उहाँले स्पष्ट पार्नुभयो ।
साथै उहाँले आफ्नो पार्टी सधै लोकतन्त्र, जनताको हित र भ्रष्टाचारको विपक्षमा उभिइरहने पार्टी भएको र कुनै पार्टीसँग गएर विलय नहुने भनाई पनि अध्यक्ष नेपालले स्पष्ट पार्नुभयो । कम्युनिष्टबीच एकाता गरी बलियो मोर्चा बनाउन आफ्नो विप्लव माओवादी लगायतका नेता तथा पार्टीसँग कुराकानी भइरहेको भनाई पनि नेता नेपालले दिनुभयो ।
