काठमाडौं । यस वर्षको भाइटीका कात्तिक २५ गते मनाइने भएको छ। नेपाल पञ्चाङ्ग निर्णायक विकास समितिले सार्वजनिक गरेको तिहारको साइतअनुसार भाइटीकाका लागि बिहान ११ बजेर ७ मिनेटको समय उत्तम रहेको छ। समितिका अनुसार भाइटीकाका दिन दिदीबहिनीले पूर्व फर्किएर दाजुभाइलाई टीका लगाइदिनुपर्नेछ भने दाजुभाइ पश्चिम फर्किनुपर्नेछ।
समितिले तिहारका अन्य पर्वको मिति र विधिसमेत सार्वजनिक गरेको छ। जसअनुसार कात्तिक २० गते धनत्रयोदशी अर्थात् धनतेरस र यमदीपदान गरिनेछ। कात्तिक २१ गते कागतिहार तथा २२ गते कुकुरतिहार र लक्ष्मीपूजा मनाइनेछ। त्यस्तै, कात्तिक २३ गते गाईपूजा र कात्तिक २४ गते गोरुपूजा तथा म्हपूजा पर्ने समितिले जनाएको छ। सोही दिन नेपाल संवत् ११४७ प्रारम्भ हुनेछ।
तिहार नेपाली समाजमा धार्मिक, सांस्कृतिक र पारिवारिक सम्बन्धलाई विशेष महत्व दिने पर्वका रूपमा मनाइन्छ। भाइटीकाका दिन दिदीबहिनीले दाजुभाइको दीर्घायु, सुख, समृद्धि र उत्तम स्वास्थ्यको कामना गर्दै सप्तरङ्गी टीका तथा माला लगाइदिने परम्परा छ। समितिले सार्वजनिक गरेको साइतअनुसार पर्व मनाउने तयारी गर्न सर्वसाधारणलाई सहज हुने अपेक्षा गरिएको छ।
