चितवन। कृषि तथा वन विज्ञान विश्वविद्यालयले शिक्षक तथा कर्मचारीले लिएको अध्ययन बिदाको स्वीकृति, अध्ययनको प्रगति र बिदा अवधिमा भएका गतिविधि जाँच्न पाँच सदस्यीय समिति गठन गरेको छ। समितिलाई अध्ययन बिदा दुरुपयोग भएको छ कि छैन भन्ने विषयसमेत छानबिन गरी प्रतिवेदन बुझाउने कार्यादेश दिइएको छ।
रजिस्ट्रार प्रा. डा. सुवीर सिंहले जारी गरेको पत्रअनुसार मन्त्रालय र विश्वविद्यालय अनुदान आयोगबाट प्राप्त निर्देशन तथा विश्वविद्यालयको कार्यकारी परिषद्को निर्णयका आधारमा समिति गठन गरिएको हो।
वनविज्ञान संकायका डीन डा. गान्धिव काफ्ले समितिका संयोजक छन्। सदस्यमा कृषि संकायका सह-डीन (प्रशासन) डा. कृष्णप्रसाद थापालिया, पशु विज्ञान, पशु चिकित्सा तथा मत्स्य विज्ञान संकायका सह-डीन (प्रशासन) राजेन्द्र बस्याल र सह-प्रशासक सहदेव चौधरी छन्। कर्मचारी प्रशासन महाशाखाका का.मु. उप-प्रशासक दिनेश अधिकारी सदस्य-सचिव छन्।
समितिले विश्वविद्यालय स्थापना भएदेखि अध्ययन बिदा लिएका शिक्षक तथा कर्मचारीको विवरण हेर्नेछ। अन्य विश्वविद्यालय वा निकायबाट समायोजन भई आएका शिक्षक तथा कर्मचारीले लिएको अध्ययन बिदा पनि छानबिनको दायरामा पर्नेछ। बिदा कुन प्रयोजनका लागि स्वीकृत भएको थियो, अध्ययनको अवस्था के छ र बिदा अवधिमा सम्बन्धित व्यक्तिले के–कस्ता गतिविधि गरेका थिए भन्ने विषय समितिले जाँच्नेछ।
समितिलाई २०८३ पुस १३ गतेभित्र रजिस्ट्रार कार्यालयमा विस्तृत प्रतिवेदन बुझाउन भनिएको छ। छानबिनको निष्कर्ष आएपछि मात्रै अध्ययन बिदा दुरुपयोग भएको वा नभएको स्पष्ट हुनेछ।
