काठमाडौँ । संसदीय सुनुवाइ समितिले सरकारले विभिन्न १३ मुलुकका लागि सिफारिस गरेका प्रस्तावित राजदूतहरूको सुनुवाइ प्रक्रिया अघि बढाएको छ।
समितिको बिहीबार बसेको बैठकले प्रस्तावित राजदूतहरूको योग्यता, अनुभव, कार्ययोजना तथा उनीहरूविरुद्ध पर्न सक्ने उजुरीका आधारमा सुनुवाइ प्रक्रिया अघि बढाउने निर्णय गरेको हो। समितिले सुनुवाइ प्रक्रिया दशैँअघि नै सम्पन्न गर्ने गरी कार्यतालिका बनाएको जनाएको छ।
समितिका सभापति बोध नारायण श्रेष्ठका अनुसार प्रस्तावित राजदूतहरूको शैक्षिक योग्यता तथा बायोडाटा, उनीहरूले प्रस्तुत गर्ने कार्ययोजना र नागरिक तहबाट प्राप्त हुने उजुरीलाई आधार बनाएर अध्ययन गरिनेछ।
सुनुवाइ प्रक्रियालाई पारदर्शी बनाउन समितिले सार्वजनिक सूचना जारी गरी १० दिनको समय दिएको छ। प्रस्तावित राजदूतविरुद्ध आगामी १९ गतेसम्म उजुरी दिन सकिनेछ भने २० गते बस्ने समितिको बैठकमा प्राप्त उजुरीमाथि अध्ययन तथा थप प्रक्रियाबारे छलफल हुनेछ।
समितिले प्रस्तावित राजदूतहरूबाट नतिजामुखी कार्ययोजनासमेत माग गरेको छ।सरकारले भारत, चीन, अमेरिका, बेलायत, जापान, इजरायल, स्पेन, जर्मनी, ओमान, मलेसिया, दक्षिण कोरिया, श्रीलंका र साउदी अरेबियाका लागि राजदूत सिफारिस गरेको हो।
प्रस्तावित राजदूत र मुलुक
भारत — डा. निश्चलनाथ पाण्डे
चीन — डा. कल्याणराज शर्मा
अमेरिका — चिरनजंग थापा
बेलायत — गौरव शम्शेर जंगबहादुर राणा
जापान — जिग्यानकुमार थापा
इजरायल — सुरेशकुमार कर्ण
स्पेन — प्राप्ति शेरचन
जर्मनी — शरू जोशी
ओमान — डा. पद्माक्षी राणा
मलेसिया — चूडामणि खरेल
दक्षिण कोरिया — प्रा. डा. सङ्गम श्रेष्ठ
श्रीलंका — डा. मञ्चला झा
साउदी अरेबिया — गिरीबहादुर सुनार।
संसदीय सुनुवाइबाट नाम अनुमोदन भएपछि सम्बन्धित मुलुकबाट एग्रिमो प्राप्त गर्ने प्रक्रिया अघि बढ्नेछ। एग्रिमो प्राप्त भएपछि राष्ट्रपतिबाट राजदूत नियुक्त हुने संवैधानिक व्यवस्था छ।
