रसुवा। बाढीका कारण क्षतिग्रस्त रसुवाको चिलिमे जलविद्युत् आयोजना क्षेत्रमा नेपाली सेनाले खोज तथा उद्धारसँगै अवरुद्ध पहुँच मार्ग पुनः सञ्चालनको कामलाई तीव्रता दिएको छ। बाढीपछि प्रभावित क्षेत्रमा आवतजावत सहज बनाउन सडक खुलाउने तथा अस्थायी मार्ग निर्माणको कामसमेत अघि बढाइएको छ।
सेनाको टोलीले आयोजनाको ‘सर्भिस टनेल’सम्म पुग्ने पहुँच सडकमा जमेको माटो, ढुङ्गा तथा दलदल हटाएर मार्ग खुलाउने काम गरिरहेको छ। वारिपारि आवतजावतका लागि जोखिमयुक्त स्थानमा डोरीको अस्थायी पुलसमेत निर्माण गरिएको छ।
गत भदौ १० गते बाढी आएलगत्तै नेपाली सेनाको टोली घटनास्थलमा पुगेको थियो। प्रारम्भिक रेकीपछि टोलीले सुरुङको प्रवेश बिन्दुबाट उद्धार तथा खोजी अभियान अघि बढाएको थियो।
सुरुङभित्र जमेको दलदल हटाउँदै अघि बढ्ने क्रममा सेनाको टोलीले दुई जनाको शव फेला पारेको थियो। त्यसपछि खोजी अभियानलाई थप व्यवस्थित बनाउन भदौ १४ गतेदेखि नेपाली र भारतीय सेनाका विशेषज्ञहरू सम्मिलित संयुक्त टोलीले काम गरिरहेको छ।
संयुक्त टोली हाल सुरुङभित्र करिब १०५ मिटरको दूरीसम्म प्रवेश गरिसकेको छ। सुरुङभित्र जमेको दलदल तथा अन्य अवरोधका कारण खोजी कार्य चुनौतीपूर्ण रहे पनि उपकरण प्रयोग गरेर उत्खनन तथा अवरोध हटाउने काम निरन्तर भइरहेको छ।
उद्धार कार्यलाई छिटो र प्रभावकारी बनाउन ‘बबक्याट’ एस्काभेटरसहित आयोजनास्थलमा उपलब्ध अन्य एस्काभेटरसमेत परिचालन गरिएको छ। ती उपकरणको सहयोगमा दलदल हटाउने, माटो तथा भग्नावशेष निकाल्ने र सुरुङभित्र खोजी गर्ने काम भइरहेको छ।
बाढीपछि आयोजनाको पूर्वाधारमा पुगेको क्षतिको अवस्थासमेत क्रमशः मूल्याङ्कन भइरहेको छ। तत्कालका लागि प्राथमिकता भने सुरुङभित्र सम्भावित रूपमा रहेका व्यक्तिको खोजी तथा प्रभावित क्षेत्रमा सुरक्षित आवतजावत सुनिश्चित गर्नेतर्फ केन्द्रित गरिएको छ।
