मुम्बई । सन् २००१ मा ‘रहना है तेरे दिल मे’बाट बलिउडमा डेब्यु गरेकी अभिनेत्री दिया मिर्जाले आफ्नो करियरको सुरुवाती चरणसँग जोडिएको एक विशेष अनुभव सार्वजनिक गरेकी छन्।
हालै नेटफ्लिक्सको चलचित्र ‘अपरेसन ह्वाइट सी’मा देखिएकी दियाले सन् २००४ मा प्रदर्शनमा आएको ‘तुमसा नहीं देखा’को छायांकनका क्रममा आफूले शरीरप्रति आत्मविश्वास र सहजता महसुस गर्न सिकेको बताएकी हुन्।
एक कार्यक्रममा बोल्दै उनले चलचित्रको एउटा गीतको छायांकनका क्रममा आफूले ब्रा र अन्डरवेयर मात्र लगाउनुपर्ने अवस्था रहेको स्मरण गरिन्। उनका अनुसार त्यस्तो अवस्थामा ठूलो संख्यामा मानिस उपस्थित रहेको सुटिङ सेटमा आफूलाई सहज महसुस गर्नु चुनौतीपूर्ण थियो।
दियाका अनुसार उक्त दृश्यको छायांकनमा करिब ५०० जनाको भीड थियो, जसमा अधिकांश पुरुष थिए। करिब २०० सदस्य रहेको प्राविधिक टोलीमा पनि पुरुषकै संख्या धेरै थियो। तर, त्यस्तो वातावरणका बाबजुद उनले आफूलाई असहज वा कमजोर महसुस गरिनन्।
बरु, उक्त अनुभवले आफूभित्र नयाँ आत्मविश्वास पैदा गरेको उनको भनाइ छ। पुरुषको दृष्टिकोण वा मानसिकताबाट प्रभावित नभई आफ्नो शरीर र सौन्दर्यलाई आफ्नै दृष्टिले स्वीकार गर्न सकिने महसुस गरेको उनले बताइन्।
दियाले उक्त अनुभवले महिलाको पहिचान केवल शरीर वा बाहिरी सौन्दर्यमा सीमित नरहेको पनि आफूले थप गहिरोसँग बुझेको बताइन्। व्यक्तिको पहिचान, व्यक्तित्व र आत्मसम्मान बाहिरी रूपभन्दा धेरै माथि हुने उनको भनाइ थियो।
उनका अनुसार सो अनुभवले आफूलाई अझ सशक्त बनाएको थियो। अरूको दृष्टिले आफ्नो आत्मविश्वास निर्धारण गर्न नहुने पाठसमेत त्यस क्रममा सिकेको उनले बताइन्।
‘तुमसा नहीं देखा’को निर्देशन सुरुमा अनुराग बासुले गरेका थिए भने पछि मोहित सुरीले चलचित्र पूरा गरेका थिए। महेश भट्ट र मुकेश भट्ट निर्मित चलचित्रमा इमरान हाशमी र दिया मिर्जाले मुख्य भूमिका निर्वाह गरेका थिए।
