काठमाडौँ । नेपाली कांग्रेसले भोटेकोशी बाढीपछिको उद्धार तथा राहत व्यवस्थापनमा सरकारले स्थानीय तह र जनप्रतिनिधिलाई प्रभावकारी रूपमा सहभागी नगराएको आरोप लगाएको छ।
नेपाली कांग्रेस केन्द्रीय नीति, अनुसन्धान तथा प्रशिक्षण प्रतिष्ठानले बाढी प्रभावित क्षेत्रका स्थानीय जनप्रतिनिधिसँग गरेको छलफलमा सहभागीहरूले पीडित नागरिकले समयमै उद्धार र राहत नपाएको गुनासो गरेका हुन्।
छलफलमा नेपाली कांग्रेसका उपसभापति तथा प्रतिष्ठानका प्रमुख विश्वप्रकाश शर्माले राष्ट्रिय विपत्तिलाई एकताबद्ध भएर सामना गर्नुपर्ने नीतिअनुसार कांग्रेसले सुरुदेखि नै सरकारलाई सहयोग गर्दै आएको बताए। तर, अहिले सरकारका कामकारबाहीबारे प्रश्न उठाउने अवस्था आएको उहाँको भनाइ थियो।
उहाँले रसुवाका जलविद्युत् आयोजनाका सुरुङमा फसेकाहरूको उद्धारमा आवश्यक प्राविधिक कामलाई प्रभावकारी ढंगले अघि नबढाई मन्त्रीहरू प्रचारमुखी बनेको आरोप लगाउनुभयो। उद्धार कार्यमा भएको लापरबाहीलाई उहाँले गम्भीर विषयका रूपमा टिप्पणी गर्नुभयो।
छलफलको सुरुआतमा रसुवा, नुवाकोट र धादिङका कांग्रेस जिल्ला सभापतिहरूले प्रभावित नागरिकले समयमा उद्धार र राहत पाउन नसकेको जानकारी गराएका थिए। संघीय सरकारले स्थानीय सरकार तथा जनप्रतिनिधिसँग पर्याप्त समन्वय नगरी काम गर्दा समस्या उत्पन्न भएको उनीहरूको भनाइ थियो।
सहभागीहरूले राहत सामग्रीको अभाव नभए पनि एकद्वार प्रणालीका कारण वास्तविक पीडितसम्म सामग्री पुग्न नसकेको बताएका छन्। कांग्रेसले उठाउँदै आएको स्थानीय तहबाटै एकद्वार प्रणाली सञ्चालन गर्नुपर्ने अडान कार्यान्वयन गर्नुपर्ने उनीहरूको सुझाव थियो।
छलफलमा शव व्यवस्थापनस्थलमा समेत लुटपाट भएको, सत्तारूढ दलका नेता तथा कार्यकर्ताले सहज पहुँच पाए पनि जनप्रतिनिधिलाई निषेध गरिएको भन्दै सहभागीहरूले असन्तुष्टि व्यक्त गरेका थिए।
बाढी प्रभावित क्षेत्रमा सरकारले प्रभावकारी काम भएको प्रचार गरे पनि वास्तविक अवस्थामा राज्यको उपस्थिति कमजोर रहेको स्थानीय जनप्रतिनिधिहरूले बताएका छन्। प्रभावित क्षेत्रमा स्थानीय जनप्रतिनिधिको भूमिका र सहभागिता बढाउनुपर्नेमा उनीहरूले जोड दिएका छन्।
छलफलमा नेपाल नगरपालिका संघका अध्यक्ष भीम ढुंगाना, गाउँपालिका राष्ट्रिय महासंघका निवर्तमान महासचिव बंशलाल तामाङ तथा रसुवा, नुवाकोट, धादिङ, सिन्धुपाल्चोक, काभ्रेपलाञ्चोक, काठमाडौं, ललितपुर र भक्तपुरका विभिन्न स्थानीय तहका प्रमुख, उपप्रमुख, वडाध्यक्ष तथा पार्टी प्रतिनिधिहरू सहभागी थिए।
