काठमाडौं । जल तथा मौसम विज्ञान विभागअन्तर्गतको बाढी पूर्वानुमान महाशाखाले आज देशका मुख्य नदीहरूमा पानीको बहाव सामान्य रहेको जनाएको छ।
बिहान ८ बजे जारी बुलेटिनअनुसार कोशी, नारायणी, बागमती, कर्णाली र महाकाली नदीको पानीको सतह सतर्कता तहभन्दा तल छ। कन्काई, कमला, बबई तथा पूर्वी र पश्चिम राप्तीलगायतका सहायक नदीमा पनि बहाव सामान्य छ।
तर, पहाडी तथा उपत्यकाका साना नदीमा भने आकस्मिक बाढीको जोखिम रहेको महाशाखाले जनाएको छ। आज संखुवासभा, सोलुखुम्बु, दोलखा, रामेछाप, सिन्धुपाल्चोक, काभ्रेपलाञ्चोक, नुवाकोट, रसुवा र धादिङका साना नदीमा बहाव उल्लेख्य बढ्न सक्नेछ।यस्तै काठमाडौं, भक्तपुर, ललितपुर, गोरखा, लमजुङ, डोल्पा, रुकुम पश्चिम र जाजरकोट आसपासका साना नदीमा मध्यम बाढीको जोखिम रहेको छ।
आगामी दुई दिन पनि सातै प्रदेशका केही साना नदीमा बहाव अचानक बढ्न सक्ने भएकाले नदी तथा तटीय क्षेत्रका बासिन्दालाई सतर्क रहन महाशाखाले आग्रह गरेको छ।
