काठमाडौं । हास्य कलाकार तथा अभिनेता जितु नेपाल (मुन्द्रे) अभिनित चलचित्र ‘आई एम जितबहादुर’ शुक्रबारदेखि देशभर प्रदर्शनमा आउने भएको छ। प्रदर्शनअघि बुधबार काठमाडौंमा चलचित्रको भव्य ग्राण्ड प्रिमियर सम्पन्न गरिएको छ।
प्रिमियर समारोहमा नेपाली चलचित्र क्षेत्रका अग्रज तथा चर्चित व्यक्तित्वहरूको उल्लेखनीय उपस्थिति रहेको थियो। कार्यक्रममा कलाकार, निर्देशक, निर्माता, गायक, सञ्चारकर्मी तथा चलचित्रका प्राविधिक टोली सहभागी भएका थिए।
प्रिमियरपछि अधिकांश चलचित्रकर्मीहरूले फिल्मको कथा, प्रस्तुति र विशेषगरी अभिनेता जितु नेपालको अभिनयको खुलेर प्रशंसा गरेका छन्। दर्शक तथा फिल्मकर्मीहरूले चलचित्रले कलाकार बन्ने सपना बोकेको एक सामान्य व्यक्तिको संघर्ष, मेहनत र सफलताको यात्रालाई भावनात्मक तथा मनोरञ्जनात्मक ढंगले प्रस्तुत गरेको प्रतिक्रिया दिएका छन्।
चलचित्रमा जितु नेपालसँगै वर्षा राउत, प्रियंका कार्की, सन्दीप क्षेत्री, देशभक्त खनाल, सारा शर्मा, अंशु महर्जन, पवन खतिवडा, राजन सिम्खडा र मिसेल घिमिरेलगायत कलाकारहरूको अभिनय रहेको छ।
फिल्मले गाउँमा बस्ने सरल, हँसिलो र सपनाले भरिएको विवाहित युवक जितबहादुरको कथा प्रस्तुत गर्छ। गाउँको सानो नाट्य मञ्चबाट अभिनय यात्रा सुरु गर्ने उसको सपना, त्यसलाई साकार पार्न उसले भोग्नुपरेका संघर्ष, चुनौती र जीवनका विभिन्न उतारचढावलाई चलचित्रले मार्मिक रूपमा चित्रण गरेको छ।
चलचित्रका निर्देशक सुभेन्दु घोष हुन् भने निर्माता स्वयं जितु नेपाल रहेका छन्। राजन सिम्खडा र दिपेन्द्र अधिकारी सह–निर्माताका रूपमा रहेका छन् भने निश्चल कुँवर र निरज नेपाल कार्यकारी निर्माता हुन्।
चलचित्रको डिजिटल अधिकार ओएसआर डिजिटलले खरिद गरेको छ भने देशव्यापी वितरणको जिम्मेवारी आरआर फिल्म्सले सम्हालेको छ।
