काठमाडौं।अमेरिका र इरानबीच जारी तनाव अन्त्य गर्ने उद्देश्यसहित दुवै देशले एक ऐतिहासिक समझदारी पत्र (एमओयू) मा हस्ताक्षर गरेका छन्। इरानको विदेश मन्त्रालय र अमेरिकी राष्ट्रपति कार्यालय ह्वाइट हाउसले संयुक्त रूपमा यसको पुष्टि गरेका हुन्।
अमेरिकी राष्ट्रपति डोनाल्ड ट्रम्प र इरानी राष्ट्रपति मसूद पेजेस्कियानले समझदारी पत्रमा डिजिटल माध्यमबाट हस्ताक्षर गरेका हुन्।
समझदारीपछि अमेरिका र इजरायलले इरानविरुद्ध गरिरहेको युद्ध औपचारिक रूपमा रोकिएको विश्वास गरिएको छ। दस्तावेजमा डिजिटल हस्ताक्षर भइसकेका कारण स्विट्जरल्यान्डको जेनेभामा आगामी शुक्रबार हुने भनिएको वार्तामा दुवै पक्षका प्रतिनिधि सहभागी भए पनि कुनै भौतिक हस्ताक्षर समारोह आयोजना नहुने इरानी विदेश मन्त्रालयका प्रवक्ता इस्माइल बाघेईले जानकारी दिएका छन्।
यसैबीच, अमेरिकी राष्ट्रपति ट्रम्पले आगामी ६० दिनको वार्ताको अवधि ‘अन्तिम समयसीमा’ नभएको बताएका छन्। सो अवधिमा दुवै पक्षले इरानको आणविक कार्यक्रमसम्बन्धी अन्तिम र ठोस सम्झौतामा पुग्नुपर्नेछ।
तर, ट्रम्पले चेतावनी दिँदै यदि ६० दिनभित्र वार्ता निष्कर्षमा नपुगे वा इरानले समझदारीको पालना नगरे पुनः युद्ध सुरु हुने र इरानमाथि ‘भीषण बमबारी’ गरिने बताएका छन्।
सम्झौता अनुसार इरानको पुनर्निर्माणका लागि ३०० अर्ब अमेरिकी डलरको विशेष कोष प्रस्ताव गरिएको छ। अमेरिकी अधिकारीका अनुसार सो कोषमा इरानका छिमेकी मुलुकहरूले योगदान गर्नेछन् र उक्त रकम युद्धबाट क्षतिग्रस्त पूर्वाधार पुनर्निर्माणमा प्रयोग गरिनेछ।
इरानले पनि आफ्ना क्षेत्रीय साझेदारहरूले देशमा करिब ३०० अर्ब डलर लगानी गर्ने र त्यसको एक हिस्सा पुनर्निर्माणमा खर्च हुने जनाएको छ।
