प्रतिनिधिसभाको आजको बैठकमा आर्थिक वर्ष २०८३/८४ को राजस्व र व्ययको वार्षिक अनुमानमाथि छलफल जारी रहेको छ। छलफलका क्रममा सांसदहरूले बजेटका पक्ष र विपक्षमा आ–आफ्ना धारणा प्रस्तुत गरेका छन्।
बैठकमा राष्ट्रिय स्वतन्त्र पार्टी (रास्वपा) का सांसद डा. कृष्णहरि बुढाथोकीले बजेटले उद्यमशीलता प्रवर्द्धनमा ध्यान दिनुपर्ने आवश्यकता औँल्याए।
नेपाली कांग्रेसका सांसद शाहजहाँ खातुनले भन्सार महसुल अघिल्लो वर्षको तुलनामा ४० प्रतिशतले वृद्धि भएको उल्लेख गर्दै अनुमानित राजस्व संकलनको आधार स्पष्ट पार्न अर्थमन्त्रीसँग माग गरे।
नेकपा (एमाले) का सांसद गणेशसिंह ठगुन्नाले बझाङ, बाजुरा, डोटी र अछामजस्ता विकास आवश्यक जिल्लामा बजेट न्यून परेको भन्दै असन्तुष्टि व्यक्त गरे। उनले सीमा क्षेत्रका आयोजनामा पनि पर्याप्त प्राथमिकता नदिइएको बताए।
नेकपा (एकीकृत समाजवादी) का सांसद पशुराम तामाङले बजेटले धनी–गरिबबीचको खाडल अझ बढाउने खतरा रहेको भन्दै पहाडी क्षेत्रमा आर्थिक गतिविधि र वन्यजन्तु नियन्त्रणका कार्यक्रम आवश्यक रहेको सुझाव दिए।
श्रम संस्कृति पार्टीका सांसद हर्कराज राईले धरानमा खानेपानीको समस्या समाधानतर्फ बजेटले पर्याप्त ध्यान नदिएको भन्दै सरकारको ध्यानाकर्षण गराए।
रास्वपाका सांसद डा. अमरेशकुमार सिंहले शिक्षामा कर लगाउने विषयप्रति असहमति जनाउँदै मौलिक अधिकारमाथि कर लगाउन नहुने धारणा राखे। उनले कर्मचारीको तलब वृद्धि भए पनि आमजनताका लागि राहतका कार्यक्रम कमजोर रहेको टिप्पणी गरे।
नेपाली कांग्रेसकी सांसद सीता थपलियाले हरेक जिल्लामा नमूना विद्यालय स्थापना गर्ने अपेक्षा भए पनि बजेटमा त्यसअनुसार कार्यक्रम नआएको बताइन्। उनले ग्रामीण क्षेत्र र किसानमुखी कार्यक्रम पनि अपर्याप्त रहेको उल्लेख गरिन्।
एमालेका सांसद टुकाभद्र हमालले आगामी बजेटले मुलुकका महत्वपूर्ण प्राथमिकता समेट्न नसकेको भन्दै थप परिमार्जन आवश्यक रहेको धारणा राखे।
बैठकमा राजस्व र व्ययको वार्षिक अनुमानमाथिको छलफल जारी रहेको छ।
