काठमाडौं । नेपाली कांग्रेसका नेता पूर्णबहादुर खड्काले पार्टीको हालै गरिएको केन्द्रीय कार्यसमिति विस्तार प्रक्रियाप्रति असन्तुष्टि जनाउँदै व्यापक र समग्र एकताको आवश्यकता औंल्याएका छन्।
पूर्वकार्यवाहक सभापति समेत रहेका खड्काले सामाजिक सञ्जालमार्फत सार्वजनिक गरेको धारणा अनुसार विशेष महाधिवेशनपछि गठित केन्द्रीय कार्यसमितिको विस्तारबारे उठिरहेका टिप्पणी, कार्यकर्ताबीच फैलिएको भ्रम तथा आफ्नो भूमिकाबारे आएका प्रश्नप्रति गम्भीर ध्यानाकर्षण भएको बताएका छन्।
उनले केही साताअघि सभापति गगनकुमार थापासँग एक्लै तथा हालै थापा र उपसभापति विश्वप्रकाश शर्मासँग संयुक्त छलफल भएको जानकारी दिँदै पार्टीको वर्तमान अवस्था, चुनौती र संगठनात्मक दिशाबारे गम्भीर छलफल भएको उल्लेख गरेका छन्।
खड्काका अनुसार छलफलमा देशको राष्ट्रियता इतिहासकै संवेदनशील अवस्थामा पुगेको, कांग्रेस कठिन राजनीतिक परिस्थितिबाट गुज्रिरहेको तथा ‘पपुलिज्म’ का नाममा संविधानवाद, लोकतन्त्र र पार्टीका मूल्यमान्यतामाथि चुनौती बढिरहेको विषय उठाइएको थियो।
उनले कांग्रेस एकताबिना राष्ट्रिय राजनीतिमा प्रभावकारी भूमिका निर्वाह गर्न नसक्ने स्पष्ट धारणा राख्दै भनेका छन्, “नेपाली कांग्रेस पार्टीको बृहत् र सम्पूर्ण एकता नभई हामी राष्ट्रिय राजनीतिमा प्रभावकारी, हस्तक्षेपकारी र सार्थक भूमिका खेल्न सक्दैनौँ।”
खड्काले पार्टी एकताको मुख्य जिम्मेवारी गगन थापाको काँधमा रहेको र त्यसपछि विश्वप्रकाश शर्माको भूमिका महत्वपूर्ण हुने उल्लेख गर्दै सबैलाई एकताको अभियानमा जुट्न आग्रह गरेका छन्।
उनले वैशाख २८ गते गरिएको भनिएको केन्द्रीय कार्यसमिति मनोनयनबारे आफूलाई कुनै जानकारी वा परामर्श नभएको पनि स्पष्ट पारेका छन्। उक्त निर्णयले पार्टीको समग्र एकताको उद्देश्यमा ठेस पुगेको उनको टिप्पणी छ।
विगतमा कांग्रेस विभाजनका कारण राजनीतिक क्षति र जनविश्वासमा गिरावट आएको स्मरण गर्दै खड्काले त्यसपछि गरिएको आत्मसमीक्षा र संगठनात्मक एकताबाट पार्टी अघि बढेको इतिहास दोहोर्याउन नहुने बताएका छन्।
हालको निर्वाचन परिणामले पार्टीलाई गम्भीर रूपमा झस्काएको उल्लेख गर्दै उनले त्यसबाट पाठ सिकेर नयाँ सोच र साझा दृष्टिकोणका साथ अघि बढ्नुपर्नेमा जोड दिएका छन्।
खड्काले अन्त्यमा पार्टी नेतृत्वले सामूहिक भावना र बृहत् एकताको दिशामा अघि बढ्ने विश्वास व्यक्त गरेका छन्।
