काठमाडौं – नेपालमै पहिलो पटक ललितपुरको ग्वार्काे चोकमा बनाउने भनिएको फ्लाईओभरको काम अझै सुरु हुन सकेको छैन । सम्झौता भएको झण्डै एक वर्ष वितिसक्दा समेत काम सुरु भएको छैन । निर्माण कम्पनीले विभिन्न बहानामा डिजाईनको काम ढिलो गरिरहेको छ । सरकारी निकाय भने समयमा सम्पन्न नभए आर्थिक क्षती नहुने भन्दै वेवास्ता गरिरहेको छ ।
उपत्यकाको धेरै व्यस्त र जाम हुने ठाउ मध्येको एक हो ग्वार्काेचोक । यो स्थानमा सवारी जाम नहुने र ट्राफिक व्यवस्थापनमा सहज हुने भन्दै सरकारले फ्लाईओवर बनाउने निर्णय ग¥यो । सरकारले ६ मिटर उचाईको फ्लाईओभर बनाउन निर्माण कम्पनीसँग सम्झौता गरेको झण्डै एक वर्ष वितिसक्यो । तर हालसम्म पनि काम सुरु हुनसकेको छैन ।
निर्माण कम्पनीले विभिन्न बहानामा डिजाईनको काम ढिलो गरेको सडक विभागको आरोप छ । यधपी ठेकेदार कम्पनीले एक हप्ता अघि मात्रै विभागलाई डिजाईन पेस गरेको बताएको छ । विभागका महानिर्देशक अर्जुनजंग अधिकारीका अनुसार अबको एक साता भित्रमा अध्ययन सकेर काम सुरु गरिने छ ।
२०७८ साल माघमा सडक विभाग र आरसी, समानान्तर रेलिग्रे जेभि विच २ वर्षमा निर्माण सम्पन्न गर्नेगरी सम्झौता भएको छ । १७ करोड ६ लाख ८८ हजार ८ सय ८८ रुपैयाँ लागतको फ्लाईओवर ४ लेनको हुनेछ । निर्माण कम्पनीलाई अबको १३ महिना भित्रमा काम सक्नुपर्ने दबाब छ । तोकिएको समयमा काम नसके कम्पनीले क्षतीपूर्ती दिनुपर्ने विभागको तर्क छ ।
विभाग उक्त योजनामा समय नथप्ने अडानमा छ । तर यती छोटो समयमा फ्लाईओभर बन्छ भन्नेमा आशंका छ । पूर्वाधारविद्हरु भने बिना पूर्वतयारी यस्ता आयोजनाहरुको घोषणा गर्न सरकारलाई सधै हतारो हुनेगरको बताउछन् । त्यसमाथी पनि ठेकेदार कम्पनीहरुका लागी दह्रो ऐन, कानुन नबन्दा हरेक विकास निर्माणका आयोजनामा समस्या आउने गरेको जानकारहरुको ठम्याई छ ।
बढी सवारी जाम हुने यस क्षेत्रमा सवारी आवागमनलाई चुस्त पार्ने उद्देश्यले फ्लाईओभर बनाउन थालिएको हो । तर निर्माण कम्पनीको मनोमानी र सरकारको बेवास्ताले समयमै फ्लाईओभर निर्माण हुनेमा आशंका छ । तसर्थ सरोकारवाला निकायले खबरदारी गर्न आवश्यक छ ।
