काठमाडौँ।नेपाल र यूरोपेली सङ्घबीचको संयुक्त आयोगको १६औँ बैठक बेल्जियमको ब्रसेल्समा शुक्रबार सम्पन्न भएको छ । बैठकमा विकास सहयोग, व्यापार, जलवायु परिवर्तन, क्षेत्रीय सम्पर्क सञ्जाल तथा बहुपक्षीय सहकार्यका विषयमा छलफल भएको नेपाली दूतावास ब्रसेल्सले जनाएको छ ।
बैठकमा नेपाल–यूरोपेली सङ्घ सम्बन्ध सकारात्मक दिशामा अगाडि बढेको उल्लेख गर्दै विकास साझेदारीदेखि जनस्तरसम्मको सम्बन्धका विभिन्न आयामबारे विचार–विमर्श गरिएको थियो । यूरोपेली सङ्घले प्रधानमन्त्री सुशीला कार्की नेतृत्वको अन्तरिम सरकारले आर्थिक अनुशासन, सुशासन, जवाफदेहिता तथा सेवा विस्तारमा गरेको कार्यको प्रशंसा गरेको छ ।
नेपालले दिगो विकास लक्ष्यमा भएको प्रगति प्रस्तुत गर्दै जलवायु परिवर्तन, विपद् जोखिम न्यूनीकरण र लगानी प्रवर्द्धनमा सहकार्य महत्वपूर्ण रहेको जनाएको छ । साथै, सङ्क्रमणकालीन न्याय प्रक्रिया कानुनअनुसार शीघ्र निष्कर्षमा पुर्याउने प्रतिबद्धता दोहोर्याएको छ ।
यूरोपेली सङ्घले नेपाललाई अल्पविकसित देशबाट स्तरोन्नतिका लागि तयार पारिएको सङ्क्रमणकालीन रणनीतिलाई स्वागत गर्दै बहुवर्षीय कार्यक्रममार्फत सहयोग निरन्तरताका साथ रहने प्रतिबद्धता व्यक्त गरेको छ ।
नेपालले हवाई सुरक्षा सुधारलाई उच्च प्राथमिकतामा राख्दै सन् २०२३ सेप्टेम्बरमा भएको यूरोपेली मूल्याङ्कन भ्रमणमा उठेका विषय समाधान गर्ने प्रतिबद्धता जनाएको छ । साथै, यूरोपियन युनियन एयर सेफ्टी सूचीबाट नेपाली एयरलाइन्सलाई हटाइदिन पुनः अनुरोध गरिएको छ ।
आयोगको १७औँ बैठक आगामी वर्ष काठमाडौँमा पारस्परिक सहमतिमा तय हुने मितिमा आयोजना गरिने जनाइएको छ । बैठकको सहअध्यक्षता परराष्ट्र सचिव अमृतबहादुर राई र यूरोपेली सङ्घका एशिया–प्रशान्त विभागका कार्यवहाक प्रबन्ध निर्देशक पाओला पाम्पालोनीले गर्नुभएको थियो ।
