धेर टुथपेस्टको प्रयोगले बालबालिकाको दाँत बिगार्न सक्छ !

बालबालिकालाई हरेक दिन बिहान बेलुका दाँत माझ्न सिकाइन्छ तर कति टुथपेस्ट लिने भन्ने चाहिँ याद गरिँदैन । एक अध्ययनअनुसार, प्रायः अधिकांश बच्चाहरुले निर्धारित मात्राभन्दा बढी टूथपेस्ट प्रयोग गरेको पाइन्छ । दन्तमञ्जनको अधिक मात्राले बच्चाको दाँतलाई हानि गर्न सक्छ । टूथपेस्टमा फ्लुओराइड हुन्छ र त्यसले दाँतलाई ब्याक्टेरियाबाट सुरक्षित राख्छ । तर यसको अधिक मात्राले दाँतको माथिल्लो पत्रलाई खियाइदिन्छ ।
दाँत उम्रिने बेला भएका बच्चालाई कम टूथपेस्ट दिनुपर्छ किनकि अधिक मात्रामा टूथपेस्ट दिँदा उनीहरूलाई डेन्टल फ्लुओरोसिस हुन सक्छ । तीनदेखि ६ वर्षसम्मका बच्चालाई ब्रशमा मटरको दाना जति मात्र टूथपेस्ट हाल्नुपर्छ । टूथपेस्ट बाहेक पानी पनि फ्लोराइडको एक स्रोत हो । दाँतमा त्यसले पनि असर पार्छ ।
फ्लोरिससको असर दाँत पलाइरहेका बच्चाको दाँतमा मात्र पर्छ । यसले दन्त स्वास्थ्यमा पूरै असर त पार्दैन तर फ्लोराइडको मात्रा नियन्त्रित नगर्दा दाँतको रंग खुइलिन्छ । यसको अत्यधिक मात्राले दाँतको बनावटमा पनि असर पार्छ ।
दाँतलाई स्वस्थ राख्न हरेक दिन आफ्नो मुख र दाँतको अवस्था आफैं जाँच्ने, दन्तचिकित्सककहाँ नियमित जाने । सरसफाइ र पौष्टिकतामा ध्यान दिने गर्नुपर्छ ।
पहिलो दाँत आउनेबित्तिकै बच्चाको दाँत सफा गर्न थाल्नुपर्छ । प्रायः ६ महिनामा पहिलो दाँत आउँछ तर त्यतिखेर ब्रश गराउन सकिएन भने मुलायम सूती कपडाले दाँत सफा गर्नुपर्छ ।’ दन्तचिकित्सकका अनुसार ‘दिनको दुईचोटि दाँत माझ्नु जरूरी छ ।