पोखरा, ११ माघ । गण्डकी प्रदेश सरकारका आन्तरिक मामिला तथा कानून मन्त्री रोशन बहादुर गाहाले प्रदेशको कानून निर्माणमा आफ्नो ध्यान केन्द्रित हुने बताउनु भएको छ ।
मन्त्रालयमा बुधबार पदभार ग्रहण गर्दै मन्त्री गाहले पत्रकारमाझँ पाँच वर्षको समयमा बन्न नसकेका कानून निर्माण गरी बनेका कानूनलाई प्रभावकारी रुपमा कार्यान्वयन गर्ने उहाँले बताउनुभयो ।
प्रदेश कानून निर्माणलाई पूर्णता दिएर आधारभूत तहसम्मका जनतालाई कानूनको प्रत्याभूति हुनेगरी काम गर्छु, उहाँले भन्नुभयो । आम संचार विधेयक, प्रदेश प्रहरी नियमावली, दैवि प्रकोप तथा विपद नियमावली तयार पारी आम नागरिकको सुशासन अनुभूति दिलाउने प्रयास आफ्नो रहेको भनाई उहाँको छ ।
हामीले निर्माण गरेका कानूनले यस क्षेत्रका जनताले सुशासनको अनुभूति गर्न सक्नु पर्छ, उहाँले भन्नुभयो– जनताको घरघरमा पुग्ने सरकार भएकाले कानूनी राज्यको सन्देश दिन सक्नुपर्छ ।
बन्न नसकेका कानूनको मस्यौदा तयार पार्दै छलफलबाट नै अगाडि वढ्दै जनतालाई शान्ति सुरक्षाको महशुस गर्ने बातावरण बनाउने प्रतिवद्धता उहाँको छ ।
आम संचार बिधेकलाई पूर्णता दिँदै स्वतन्त्र प्रेसको पक्षमा कानून तयार हुने भनाई उहाँको छ । लोकतन्त्र प्राप्तिका लागि भूमिका खेलेका संचारकर्मीमाथि अंकुश लगाउने काम आफूबाट नहुने भनाई पनि उहाँको छ ।विपद्मा परेका जनातालाई छिटो छरितो उद्धार तथा व्यवस्थापन र राहत प्रदान हुने किसिमबाट आफूले कानून निर्माण गर्ने भनाई उहाँको छ ।
