काठमाडौं । आउँदो दसैँमा यात्रुहरूको सहज र सुरक्षित आवागमन सुनिश्चित गर्न सरकारले सरोकारवालासँगको छलफलपछि ६ बुँदे सहमति गरेको छ। आइतबार भौतिक पूर्वाधार तथा यातायात मन्त्रालयमा भएको बैठकमा मन्त्रालयका सचिव केशव शर्मा, यातायात व्यवसायी, ट्राफिक प्रहरी, नाडा अटोमोबाइल्स एसोसिएसनलगायतका प्रतिनिधिहरू सहभागी थिए।
बैठकले उपत्यकाबाट बाहिरिने यात्रुहरूको चापलाई व्यवस्थित गर्न नेपाल यातायात व्यवसायी राष्ट्रिय महासङ्घ र सम्बन्धित संघ–संस्थालाई आवश्यक सहयोग पुर्याउन आग्रह गरेको छ।
उच्चस्तरीय समिति गठन : यात्रुको सुरक्षा र गुनासो व्यवस्थापनका लागि यातायात व्यवस्था विभागका महानिर्देशकको संयोजकत्वमा उच्च स्तरीय समिति गठन गर्ने निर्णय भएको छ। समितिमा नेपाल प्रहरी, राजमार्ग सुरक्षा महाशाखा, ट्राफिक प्रहरी र यातायात व्यवसायी महासङ्घका प्रतिनिधि रहनेछन्।
यद्यपि, दसैँका लागि अग्रिम टिकट बुकिङ कहिलेदेखि सुरु गर्ने भन्नेबारे बैठकले निर्णय गर्न सकेन। अघिल्ला वर्षमा सरोकारवालासँग छलफल गरेर टिकट बुकिङको मिति तोकिने प्रथा यसपालि पनि दोहोरिने देखिन्छ।
