पार्टी अध्यक्ष र ‘सम्मानित नेता’बीच भनाभन परिरहँदा झलनाथ खनाल र अर्का नेता वामदेव गौतमबीच भेटघाट भएपछि नेकपा एकीकृत समाजवादी पार्टीभित्र अर्को खैलाबैला सुरु भएको छ।
केही दिनअघि एउटा टेलिभिजन अन्तर्वार्तामा पार्टीका ‘सम्मानित नेता’ झलनाथ खनालले एमाले विभाजनको औचित्य पुष्टी नभएको र माधव नेपालसँग मिलेर गरिएको त्यो निर्णय गलत रहेको उनले ठम्याएका थिए।
त्यसपछि पार्टी अध्यक्ष माधव नेपालले झलनाथ खनाललाई पार्टी छोडेर जान सुझाव दिए। अनि झलनाथ खनालले पनि अध्यक्षलाई बरु पार्टी नेतृत्व छोड्न भने।
‘मिडियामा गएर पार्टीको विरोध गर्ने, विद्रोहको औचित्य छैन भन्ने अनि यहाँ किन आउनुपर्यो?’ शुक्रबार आयोजित एक कार्यक्रममा पार्टी अध्यक्ष माधव नेपालले खनाललाई लक्षित गर्दै भनेका थिए ‘त्यो विद्रोह (नेकपा एमाले विभाजन) ठीक लागेन भने केपी ओलीकै सेवा गरेर बसे भइहाल्थ्यो नि!’
शनिबार एउटा पत्रकार सम्मेलनमा झलनाथ खनालले फेरि माधव नेपाललाई जवाफ फर्काए। उनले बरु नेपालले नै राजीनामा दिए राम्रो हुने पनि सुझाव दिए।
‘पार्टी चलाउन नसक्ने, काम गर्ने क्षमता छैन भने त्यस्ता मान्छेहरू (माधव नेपाल) आफै बाटो लागे हुन्छ’ खनालले भनेका थिए ‘झलनाथ खनाल पार्टी छोडेर भाग्ने मान्छे होइन।’ उनले आफूले पार्टी छोडेर जाने कुनै कल्पना पनि नभएको पनि बताए।
‘बरु कसैलाई यो पार्टी चाहिएको छैन भने त्यस्ता मान्छे छोडेर गए हुन्छ’ खनालले भनेका थिए।
शुक्रबारको कार्यक्रममा खनालले पार्टीको अनुशासनविपरित अभिव्यक्ति दिँदै हिँडेको भन्दै पार्टीबाट राजीनामा दिन पनि भनेका थिए।
दुई शीर्ष नेताबीच विवाद चर्किरहेका बेला खनाल र वामदेव गौतमबीच भएको भेटघाटले पार्टीभित्र अर्को तरंग ल्याएको छ। शनिबार यी दुबै नेताबीच डल्लुस्थित खनाल निवसामा भेटघाट भएको हो। उनीहरूबीच लगभग ४ घण्टासम्म कुराकानी भएको छ।
खनालका अनुसार लगभग चार वर्षपछि यसरी भएको भेटघाटमा पार्टी राजनीतिसँगसँगै ‘अन्तरंग’ कुराकानी पनि भयो।
गत साउन २ गते एकीकृत समाजवादी पार्टीमा प्रवेश गरेका वामदेव गौतमले केही दिनपछि नै आफूलाई पार्टीले कुनै ‘काम नदिएको’ भन्दै असन्तुष्टी व्यक्त गर्न थालिसकेका छन्। पार्टीमा स्वागत गर्दै नेपाल र खनालले गौतमलाई अंगालोमा कसेका थिए।
नेताहरूबीच कित्ताकाट हुँदै गर्दा एकीकृत समाजवादी पार्टीले भदौ चार गतेदेखि पार्टीको स्थायी कमिटी, पोलिटब्यूरो र केन्द्रीय कमिटीको बैठक एकैपटक बोलाएको थियो। यसअघि भएको निर्णयअनुसार भदौ चार गते स्थायी कमिटी बैठक, ५ गते पोलिटब्यूरो र भदौ ८ गते केन्द्रीय कमिटी बैठक सुरु हुने भनिएको थियो।
तर शनिबार नेताहरू खनाल र गौतमबीच भेटवार्ता भएको खबरपछि राति अबेरगरी त्यो बैठक सारिएको छ। शनिबार राति नै कमिटीका पदाधिकारी तथा सदस्यहरूलाई सर्कुलर गरिएको म्यासेजका अनुसार अब ती बैठकहरू २० दिनपछिमात्रै हुनेछन्।
बैठक सारिएपछि खनाल पक्षधर नेताहरूले यसलाई पार्टी नेतृत्वको ‘अपरिपक्व निर्णय’ भनेर टिप्पणी गरेका छन्।
पतञ्जलीकाझ जग्गा किनबेच प्रकरणमा भ्रष्टाचारको मुद्दा खेपिरहेका पूर्वप्रधानमन्त्री नेपाल त्यो मुद्दासँगै पार्टीभित्र कमजोर हुँदै गएका छन्। विशेष अदालतमा धरौटी तिरेर बाहिर बसेरै मुद्दा लड्ने सुविधा पाएका नेपालको मुद्दामा अन्तिम फैसला आइसकेको छैन।
अदालतमा उक्त मुद्दा दर्ता भएलगत्तै पार्टी नेतृ रामकुमारी झाक्रीले ‘मरेको सिनो बोकेर हिँड्न सकिँदैन’ भन्दै नेपाललाई राजीनामा दिन सुझाव दिएकी थिइन्। यसैबीचमा वामदेव पनि पार्टीमा मिसिए। अनि अहिले पार्टीका ‘सम्मानित नेता’ले पनि माधव नेपाललाई राजीनामा दिन भनिरहेका छन्।
