पोखरा, ९ कात्तिक । निर्वाचन आचार संहिताकै कारण खुलेर चुनाव प्रचार गर्न नसकेका राजनीतिक दलहरुको प्रचार शैली यस पटक फरक बनेको छ । निर्वाचन आयोगले आम सभा, जुलुस र माइकिङ गर्न कात्तिक १७ गतेपछि तोकिदिएका कारण पार्टीहरुले चुनाव प्रचार प्रसार शैली आफ्नै निर्वाचन क्षेत्रका सम्पर्क कार्यालय शुभारम्भ गरेर गर्ने गरेका छन् । यस्तो प्रचार आफ्ना पार्टीका कार्यकर्ता माझ मात्र हुने गरेको छ । केही मात्रामा घरदैलो कार्यक्रम गरेको भएपनि उम्मेदवारले एक दर्जन कार्यकता मात्र लिएर पुग्ने गरेका छन् ।
यसै सन्दर्भमा बुधबार कास्की निर्वाचन क्षेत्र नं २ (२) को चुनाव प्रचार प्रसार समितिको सम्पर्क कार्यालय शुभारम्भ गरिएको छ । उक्त निर्वाचन क्षेत्रमा प्रदेश सभा सदस्यको लागि पाँच दलीय गठबन्धनबाट नेपाली काँग्रेसका नेता बिन्दुकुमार थापा उम्मेदवार छन् । थापाको नयाँबजार स्थित आफ्नै घरमा संचालनमा ल्याइएको उक्त सम्पर्क कार्यालयको शुभारम्भ नेपाली काँग्रेस गण्डकी प्रदेशका सभापति शुक्रराज शर्मा र काँग्रेस केन्द्रीय सदस्य गुरु बरालले सयुक्त रुपमा गर्नुभएको हो । सो अवसरमा बोल्दै सभापति शर्माले लोकतन्त्रबाट नै हरेक क्षेत्रको विकास सम्भव भएकाले पाँचदलीय गठबन्धनका उम्मेदवारलाई एक ढिक्का भएर मतदान गर्न आग्रह गर्नुभयो ।
सोही अवसरमा नेकपा (माओवादी) केन्द्रका नेता राजकाजी गुरुङले संविधान रक्षाका लागि प्रतिगमनकारी गठबन्धनलाई नभई लोकतान्त्रिक गठबन्धनलाई मतदान गर्न आग्रह गर्नुभयो । लोकतन्त्र र संविधानको रक्ष ागर्न पाँच दलीय गठबन्धनले मात्र सक्ने भनाई गुरुङको छ । नेपाली काँग्रेसका केन्द्रीय सदस्य गुरु बरालले केपी ओलीले लोकतन्त्रलाई नै खतरामा पारेपछि लोकतन्त्र र संविधान रक्षाका लागि पाँच दलीय गठबन्धन गरिएको बताउनुभयो ।
संविधानको रक्षा गर्दै लोकतन्त्र बिरोधी र तानाशाहीहरलाई ठेगान लगाउनुपर्ने बरालको जोड थियो । सो अवसरमा नेकपा (एकीकृत) समाजवादीकी नेता दिलु पन्तले केपी ओली पञ्चहरुसँग गठबन्धन गरेर लोकतन्त्रलाई नै समाप्त पार्न खोजेको आरोप लगाउनुभयो । सो अवसरमा कास्की निर्वाचन क्षेत्र नं २ बाट प्रतिनिधि सभा सदस्यका उम्मेदवार श्रीनाथ बराल, कास्की निर्वाचन क्षेत्र नं २ (२) का प्रदेश सभा सदस्य उम्मेदवार बिन्दुकुमार थापा लगायतले आफ्ना भनाई राखेका थिए । त्यूतै कास्की निर्वाचन क्षेत्र नं २ (१) बाट नेकपा (माओवादी) केन्द्रबाट विश्वप्रकाश लामिछाने उम्मेदवार छन् ।
