पोखरा, ११ कात्तिक । बिशेषगरी तराई क्षेत्रमा बस्ने हिन्दूहरुले प्रत्येक वर्ष मनाउँदै आएको छट पर्वको पूजालाई व्यवस्थित गरिने भएको छ । छट पर्व पूजा गरिने स्थानहरु पोखराको केदारेश्वर महादेवमणि मन्दिर नजिकैको फेवाताल किनार, नदीपुर स्थित नारायणस्थानको सेतीनदी घाट, कालीखोला किनार र भद्रकाली मन्दिर नजिकैको माछा पोखरीमा पूजा र स्नान गर्ने भक्तजनलाई व्यवस्थित गर्न लागिएको हो ।
छट पर्व पूजालाई व्यवस्थित गर्न बनेको छट पर्व पूजा समिति पोखराका अध्यक्ष रामआधार प्रसाद गुप्ताले छट पर्वमा पूजा, स्नान तथा राति जाग्राम बस्दा महिलाहरुले दुःख, कष्ट भोग्नु परेकै कारण खोला तथा तालका घाटलाई व्यवस्थित गर्न लागिएको जानकारी शुक्रबार पोखरामा आयोजित पत्रकार सम्मेलनमा दिइएको छ । समितिद्धारा आयोजित पत्रकार भेटघाट कार्यक्रममा अध्यक्ष गुप्ताले तराई तथा भारतीय मुलका हिन्दूहरुले पोखरामा ३५ वर्षदेखि छट पर्व मनाउँदै आएको र छट पर्व मनाउनेको संख्या प्रतिवर्ष वृद्धि भएकै कारण नदी तथा तालका घाटहरुलाई यस वर्षदेखि व्यवस्थित गर्न लागिएको बताउनुभयो ।
पोखराका कालीखोला, माछापोखरी, फेवाताल र नारायणस्थानको सेती नदी किनारका घाटहरुमा छट पूजा गर्नेको संख्या चार हजार हुने गरेको जानकारी पनि गुप्ताले दिनुभयो । यो पर्वमा षष्ठी भगवतीको पूजा अर्चना गरी पुत्र, पति र परिवारको कल्याणको कामना गरिने गरिन्छ । पूजा समितिका सचिव गोरखनाथ जैसवालले यस पर्वमा पञ्चमीका दिनदेखि व्रत बस्ने महिला तथा पुरुषले निष्ठा पूर्वक पवित्र जलाशयमा स्नान गरी बेलुका दूध, चामल र सख्खरको खीर पकाई प्रसादको रुपमा आफू र व्रत नबस्ने परिवारका अन्य सदस्यलाई समेत ख्वाउने चलन छ ।
परम्परा अनुसार छटका दिन साँझ अस्ताउँदो सूर्यलाई जलाशयमा उभिएर पूजासहित अर्घ दिएपछि रातभर नदी तथा तलाउ किनारमा बसी भजनकीर्तन गर्दै भोलिपल्ट सप्तमीका दिन बिहान उदाउँदो सूर्यलाई पुनः अर्घ दिई पूजा विसर्जन गरिने जानकारी सचिव जैसवालले दिनुभयो । सूर्य उपासनासँग सम्बन्धित छट पर्व प्रत्येक वर्ष कात्तिक शुक्ल पञ्चमी र षष्ठीका दिन मनाइने गरिन्छ । व्रत बस्नेहरु स्नान गरेर उपवास बसी आत्मशुद्धि गर्छन जसलाई खर्ना भनिन्छ समितिका उपाध्यक्ष अनिल गुप्ताले भन्नुभयो । षष्ठीका दिन नदी तथा पोखरीका घाटमा व्रतालुहरुले स्नान गरी बेलुकाको समयमा जलासयमा उभिएर सूर्यलाई फलफूल,, ठेकुवा र कसार अर्घ दिन्छन् । शुद्ध भावनाले यो वर्त गर्नाले तुरुन्त फलपनि पाइने विश्वस धर्मालम्बीहरुको छ । कार्तिक शुक्ल चतुदर्शीका दिनबाट छट पर्व शुरु हुन्छ । यो पर्व नेपाल र भारतका विभिन्न स्थनमा मनाइन्छ । यो पर्व चैत महिनामा पनि मनाइने जानकारी पत्रकार सम्मेलनमा दिइएको थियो ।
