पोखरा, ७ माघ । समाजसेवी विष्णुदेवी श्रेष्ठलाई २०७९ सालको सिद्धि–सेतुली स्मृति पुरस्कार र दृष्टिविहीन शिक्षिका तथा समाजसेवी शोभा पौडेललाई सानिमा स्मृति पुरस्कार प्रदान गरिएको छ ।
स्व. सेतुलीमाया शाक्यको सोह्रौं वार्षिक पुण्यस्मृति तथा सानिमाको पाँचौं पुण्यस्मृतिका अवसरमा सिद्धि–सेतुली स्मृति प्रतिष्ठान, पोखराले शनिबार आयोजित एक कार्यक्रममा ती पुरस्कार प्रदान गरेको हो । नेपाल राष्ट्र बैंकका पूर्व गभर्नर एवं राष्ट्रिय योजना आयोगका पूर्व उपाध्यक्ष दीपेन्द्रबहादुर क्षत्रीले उनीहरुलाई सम्मान गर्नुभएको हो । पुरस्कारको राशि जनही १५ हजार रुपैयाँ रहेको छ ।
सामाजिक जागरणमा सेवा पु¥याएको भन्दै प्रतिष्ठानले श्रेष्ठलाई सम्मान गरेको हो । श्रेष्ठ चितवनमा जन्मिएर हाल पोखरा–१४ चाउथेमा बस्दै आउनुभएको छ । दृष्टिविहीन भएर पनि विगत लामो समयदेखि शैक्षिक सेवामा संलग्न रही अपांगहरुको सशक्तिकरणमा भूमिका खेलेको भन्दै सानिमा पुरस्कारबाट पौडेललाई सम्मान गरिएको हो । पौडेल पोखराको भलाम निवासी हुनुहुन्छ ।
कार्यक्रममा सात जना ज्येष्ठ नागरिकलाई समेत सम्मान गरिएको थियो । कार्यक्रममा बोल्दै प्रमुख आमन्त्रित व्यक्तित्व दीपेन्द्रबहादुर क्षत्रीले देशमा भ्रष्टाचारले जरा गाड्दै जानु दुःखद भएको बताउनुभयो । राजनीतिक दलका नेताहरु भ्रष्टाचारमा लिप्त हुँदा समाजमा गलत परम्परा र विकृति फैलिएको बताउनुभयो । साथै उहाँले राजनीतिकै कारण समाज पनि भ्रष्टाचारतर्फ आगाडि वढेको बताउनुभयो ।
प्रतिष्ठानका अध्यक्ष एवं कार्यक्रमका सभापति कृष्णप्रसाद बास्तोलाले एकल महिला र अपांगता भएका व्यक्तित्वहरुलाई समेत प्रतिष्ठानले सम्मान र सम्झना गरेको बताउनुभयो ।प्रतिष्ठानबारे जानकारी दिंदै संस्थापक संरक्षक विश्वरत्न शाक्यले संस्थाले विगत १२ वर्षदेखि बालशिक्षा कार्यक्रमलाई अघि सारेर असहाय बालवालिकाहरुको शैक्षिक जागरणका लागि सहयोग जुटाउने कार्य गर्दै आएको स्मरण गराउनुभयो ।
