पोखरा, ७ माघ । गण्डकी प्रदेशका मुख्यमन्त्री खगराज अधिकारीले शिक्षा र स्वास्थ्य निशुल्क गर्ने सरकारको नीति भएकाले कुनैपनि बालवालिका शिक्षा र स्वास्थको पहुँचबाट टाढा हुन नहुने बताउनुभएको छ । मातृसेवा प्रतिष्ठान नेपालद्धारा शनिबार पोखरामा आयोजित गरिब तथा जेहेनदार विद्यार्थीको लागि छात्रवृत्ति वितरण कार्यक्रमलाई सम्बोधन गर्दै मुख्यमन्त्री अधिकारीले सरकारले पनि यस अभियालाई अघि बढाउन सहयोग गर्ने बताउनुभयो ।
शिक्षाले नै सभ्य समाज निर्माण गर्न सक्ने बताउँदै मुख्यमन्त्री अधिकारीले विद्यार्थीहरुले सधैंभर माता, पिता र गुरुको सम्मान गर्नु पनि जोड दिनुभयो । उक्त अवसरमा २ सय ९ जना विद्यार्थीलाई कुल १२ लाख २१ हजार रुपैयाँ छात्रवृत्ति रकम वितरण गरिएको थियो । कुनै पनि दाताको सहयोगबिनै प्रतिष्ठानले प्राविधिक विषय अध्ययनका लागि निरन्तर छात्रवृत्ति वितरण गर्दै आएकोमा यसपटक समता शिक्षा निकेतनका १ सय ९२ र आनन्दज्योति माविमा जेटिए अध्ययनरत ११ विद्यार्थीलाई छात्रवृत्ति वितरण गरिएको पूर्व मन्त्री एवं प्रतिष्ठानका संस्थापक अध्यक्ष हरि पाण्डेले जानकारी दिनुभयो ।
उहाँका अनुसार प्रतिष्ठानले यसअघि विभिन्न नाममा देशभरका गरी ६ सय २५ जना विद्यार्थीलाई पूर्ण तथा आंशिक छात्रवृत्ति वितरण गरिसकेको छ । यसपालि समताका प्रतिविद्यार्थी ४ हजार र व्यवस्थापन खर्च १५ सय गरी कुल ५ हजार ५ सय र आनन्दज्योतिका प्रतिविद्यार्थीले १५ हजार रुपैयाँ प्राप्त गरेको जानकारी समाजका पूर्व अध्यक्ष कुलप्रसाद घिमिरेले दिनुभयो ।
कार्यक्रममा नेपाल उद्योग वाणिज्य महासंघका पूर्व अध्यक्ष आनन्दराज्य मुल्मी, पोखरा उद्योग वाणिज्य संघका अध्यक्ष पवनकुमार प्रजापति, लेखनाथ उद्योग वाणिज्य संघका अध्यक्ष छत्रधर आत्रेय, पाल्पाली समाजका अध्यक्ष रेशम रचक लगायतले मातृसेवा प्रतिष्ठानको कार्यको प्रशंसा गरेका थिए । प्रतिष्ठान अध्यक्ष तुलसा पाण्डेको अध्यक्षतामा भएको कार्यक्रमको संचालन कार्यक्रम संयोजक खेम सारुले गर्नुभएको थियो ।
छात्रवृत्ति रकमले विद्यार्थीलाई सहयोग पुग्ने समता स्कुलका प्रिन्सिपल झलकप्रसाद पौडेलले बताउनुभयो । कार्यक्रममा समता स्कुलका संस्थापक उत्तम सञ्जेलको पनि उपस्थिति थियो ।प्रतिष्ठानका संस्थापक अध्यक्ष समाजसेवी हरि पाण्डेले छात्रवृत्तिको सदुपयोग गरी स्वास्थ्य, विचार र सम्पत्तिलाई जोड दिंदै राष्ट्रको लागि योग्य नागरिक बन्न विद्यार्थीलाई सुझाउनुभयो ।
