काठमाडौं । सम्पूर्ण विद्यार्थीहरू एकजुट होऔं’ भन्ने नारा बोकेर रत्न राज्यलक्ष्मी (आरआर) क्याम्पसको स्वतन्त्र विद्यार्थी युनियन (स्ववियु) ले आयोजना गर्न लागेको ‘आरआर स्ववियु कप–२०८२’ अन्तरक्याम्पस स्तरीय पुरुष भलिबल प्रतियोगिता भदौ २२ गतेदेखि सुरु हुने भएको छ।
छ दिनसम्म सञ्चालन हुने प्रतियोगिता आरआर क्याम्पस परिसरमा भदौ २२ देखि २७ गतेसम्म हुने आयोजकले जनाएको छ। देशभरका विभिन्न क्याम्पसका टिमहरूले सहभागिता जनाउने अपेक्षा गरिएको छ।
भलिबलमार्फत एकता, अनुशासन र नेतृत्व विकासको अभियान
सो क्याम्पसका स्ववियु अध्यक्ष लोकेश कुमार खड्काले प्रतियोगिताको उद्देश्य खेलकुदमार्फत विद्यार्थीहरूबीच आपसी सहकार्य, अनुशासन, नेतृत्व विकास र राष्ट्रिय एकता प्रवर्द्धन गर्नु रहेको बताए। “देशभरबाट टोलीहरू सहभागी हुने विश्वास छ,” उनले भने, “खेलकुदले सकारात्मक प्रतिस्पर्धा र समझदारी ल्याउँछ।” प्रतियोगितामा उत्कृष्ट प्रदर्शन गर्ने टोलीहरूलाई आकर्षक नगद पुरस्कार प्रदान गरिनेछ।
विजेता टोलीः रु ३ लाख, ट्रफी र प्रमाणपत्र,दोस्रो टोली ःरु २ लाख, ट्रफी र प्रमाणपत्र,तेस्रो टोलीः रु १ लाख, ट्रफी र प्रमाणपत्र तोकिएको छ ।
२० हजार रुपैयाँको दर्ता शुल्क तोकिएको प्रतियोगितामा सहभागिताका लागि इच्छुक टोलीहरूले ९८६५८६३२३५, ९८६०१३६६४२ वा ९८६८९०६६६८ नम्बरहरूमा सम्पर्क गर्न सक्नेछन्।
स्ववियु सचिव शैलेन्द्र उपाध्यायले विद्यार्थी आन्दोलनको ऐतिहासिक पृष्ठभूमिलाई ध्यानमा राख्दै खेलकुदमार्फत विद्यार्थी एकताको सन्देश दिन खोजिएको बताए। “पढाइसँगै खेलकुदमा अग्रसर हुनुपर्छ भन्ने सोचका साथ प्रतियोगिता ल्याएका हौं,” उनले भने, “यसलाई सफल बनाउन सम्पूर्ण विद्यार्थी, शिक्षक, कर्मचारी तथा शुभेच्छुकहरूलाई सहकार्यका लागि अनुरोध गर्दछु।”
आरआर स्ववियु कप–२०८२ ले देशभरका विद्यार्थीहरूलाई एक साझा मञ्चमा ल्याई नेतृत्व र सहकार्यको भावनालाई सशक्त बनाउन सक्ने आयोजकहरूको विश्वास छ।
