धौलागिरि (म्याग्दी), जिल्लाको पर्यटकीयस्थल अन्नपूर्ण गाउँपालिका-६ स्थित घोडेपानी-पुनहिल क्षेत्रमा एक वर्षमा ३० हजारभन्दा बढी पर्यटकले भ्रमण गरेका छन् ।
राउण्ड अन्नपूर्णअन्तर्गत प्रसिद्ध पर्यटकीयस्थलमा कास्कीको पोखरा-नयाँपुल, घान्दु्रक हुँदै घोरेपानी र यता म्याग्दी सदरमुकाम बेनी-तातोपानी, घार, शिख हुँदै घोरेपानी र नागीलगायत क्षेत्रमा गत आर्थिक वर्ष २०८१/८२ मा ३० हजार ८८५ पर्यटकले भ्रमण गरेको पर्यटक प्रहरी चौकी घोडेपानीले जनाएको छ ।
समुद्री सतहबाट तीन हजार २१० मिटरको उचाइमा अवस्थित पुनहिलबाट सूर्योदय तथा मनोरम हिमशृङ्खलाको अवलोकन गर्न सवारीसाधन तथा पदैलमार्गबाट घोडेपानी हुँदै जाने गरिन्छ ।
जिल्ला प्रहरी कार्यालयका प्रहरी निरीक्षक सागर पौडेलले दिएको जानकारीअनुसार घोडेपानीमा आगमन भएका पर्यटक २३ हजार ८६८ जनामध्ये पुरुष १२ हजार ३९६ जना र महिला ११ हजार ४७२ जना रहेका छन् । घोडेपानी र पुनहिल आसपासको अवलोकन गरी बाहिरिने छ हजार ९९७ जनामध्ये पुरुष तीन हजार ६२१ जना र महिला तीन हजार ३७६ जना रहेका छन् ।
घोडेपानी र पुनहिलमा सबैभन्दा बढी पर्यटक कात्तिक महिनामा चार हजार २१३ जना रहेकामा सबैभन्दा कम असारमा ४४९ छन् । पर्यटक प्रहरी चौकी घोडेपानीले घोडेपानी भित्रिने र बाहिरिने पर्यटकको विवरणसहितको अभिलेख राख्दै आएको छ ।
घोडेपानीमा विदेशीसँगै आन्तरिक पर्यटकले भ्रमण गर्ने गरेका घोडेपानी होटल व्यवस्थापन समितिकी अध्यक्ष मिना पुनले बताउनुभयो । “सडक सञ्जाल बिग्रिएकाले आन्तरिक पर्यटकको सङ्ख्या घटेको छ, सडकलाई सहज बनाउन सकेमा धेरै पर्यटक ल्याउन सकिन्छ”, उहाँले भन्नुभयो ।
पोखरेबगरबाट घार-खिवाङ-शिख-चित्रे सडकअन्तर्गत अन्नपूर्ण-५ घोप्टेखर्कमा सडक अहिले पनि सहज छैन । घोडेपानी जाने पर्यटकले प्रयोग गर्ने पोखरेबगर-चित्रे-घोडेपानी सडकअन्तर्गत लुलिया र हल्लेखर्कको घुम्तीमा सडक भासिएपछि यात्रुवाहक बस सञ्चालन हुन नसक्दा अघिल्लो वर्ष आन्तरिक पर्यटकको सङ्ख्यामा कमी आएको समितिकी अध्यक्ष पुनले जानकारी दिनुभयो । म्याग्दीमा घोडेपानीबाहेक अन्य पर्यटकीयस्थलमा गएका विदेशी पर्यटकको स्थानीय प्रहरी, सरकारी निकायले तथ्याङ्क राख्ने गरेका छैनन् ।
