भोजपुर। भोजपुरको रामप्रसादराई गाउँपालिका–२ धोद्लेखानीमा एकै परिवारका चार जनाको हत्या भएको छ।
जिल्ला प्रहरी कार्यालय भोजपुरका अनुसार भोजपुर नगरपालिका–२ हेलौंछा घर भएका राजेन्द्र राईले ससुराली घरमा रहेकी श्रीमती मनिषा गिरीसहित चार जनाको हत्या गरेका हुन्। हत्या हुनेहरूमा राजेन्द्रकी २८ वर्षीया श्रीमती मनिषा गिरी, ६८ वर्षीय ससुरा बेलबहादुर गिरी, ४५ वर्षीया सासु मञ्जु गिरी र १८ वर्षीय सालो सपन गिरी छन्।
प्रहरी निरीक्षक उमेशप्रसाद यादवका अनुसार घटना शुक्रबार राति सवा १ बजेतिर भएको हो। घटनापछि आरोपी राजेन्द्र राई आफैं पनि गम्भीर घाइते अवस्थामा फेला परेका छन्। उनको पेटमा छुरी लागेका तीन घाउ रहेका छन्। उनलाई भोजपुर अस्पताल ल्याइएको र थप उपचारका लागि धरान रेफरको तयारी भइरहेको प्रहरीले जनाएको छ।
स्थानीयका अनुसार मनिषा केही दिनअघि माइती पुगेकी थिइन्। उनलाई लिन ससुराली पुगेका राजेन्द्र र परिवारबीच विवाद भएको प्रारम्भिक जानकारी आएको प्रहरीले जनाएको छ।
प्रहरीका अनुसार घटना कुन कारणले भयो भन्ने खुल्न बाँकी छ। घटनाबारे थप अनुसन्धान भइरहेको छ। प्रहरी चौकी बोयाङ र जिल्ला प्रहरी कार्यालयबाट टोली घटनास्थलमा पुगिसकेको छ।
