म्याग्दी –हिन्दुहरूको धार्मिकस्थल भारतको अयोध्यामा निर्माण गर्न लागिएको राम मन्दिरमा म्याग्दीको कालीगण्डकी नदी किनारको शिलाबाट बनेको मूर्ति राखिने भएको छ ।
मूर्ति बनाउन लैजान तयार पारिएको शिला उत्खनन्स्थलमा आइतबार क्षमापूजा गरिएको छ । बेनी नगरपालिका–६ ठूलोपहिरोस्थित कालीगण्डकी नदी किनारमा गण्डकी प्रदेशका प्रमुख पृथ्वीमान गुरुङले धार्मिक बिधिअनुसार क्षमापूजा गरेका हुन् ।
क्षमापूजापछि नगरप्रमुख केसीले प्रदेश प्रमुख गुरुङ र जनकपुरको जानकी मन्दिरका पिठाधीश राम तपश्वेर दासमार्फत् अयोध्याको राम मन्दिर निर्माण समितिका सचिव राजेन्द्रसिंह पंकजलाई शिलाको प्रतीक स्वरूप ३ वटा शालिग्राम हस्तान्तरण गरेका थिए । नेपाल सरकारको निर्णय अनुसार १८ र १६ मेट्रिकटन तौल भएका, ७ फिट लम्बाइ, ५ फिट चौडाइ र ३ दशमलव ५ फिट मोटाइका २ वटा शिलाको पहिचान, नापजाँचको काम सकिएपछि पठाउनुअघि क्षमापूजा गरिएको हो ।
नगरप्रमुख केसीले प्रदेश सरकारले सम्झौता गरेको कम्पनीको क्रेन आएपछि शिला उत्खनन् गरी टिपरमा राखेर बाजागाजा र पूजाआजा गरेर केहीदिनमै जनकपुर पठाइने जानकारी दिए ।
‘अयोध्या र जनकपुरको धार्मिक, सांस्कृतिक र आर्थिक सम्बन्धलाई यो शिलाले कालीगण्डकी र म्याग्दीसम्म विस्तार गर्छ,’ कांग्रेस नेता विमलेन्द्र निधिले भने ‘शिला उत्खनन् भएको ठाउँ धार्मिक स्थलको रूपमा विकास हुने र कालीगण्डकीको महत्व झनै बढ्नेछ ।’
बेनी नगरपालिका र गण्डकी प्रदेश सरकारले शिला मधेश प्रदेश सरकारलाई हस्तान्तरण गर्ने र जनकपुरबाट नेपाल सरकारले भारत सहकारलाई हस्तान्तरण गरेपछि अयोध्या पठाइने निधिले जानकारी दिए ।
शालीग्राम पाइने कालीगण्डकी नदीले पवित्र बनेका शिला भगवानकै प्रतीक भएको राम मन्दिर निर्माण समितिका सचिव पंकजले बताए । ‘यहाँबाट लैजाने शिलाबाट श्रीरामको मूर्ति बनाएर मन्दिरमा राख्छौं,’ उनले भने ‘शालिग्राम पाइने कृष्णा गण्डकीको किनारका शिला देवताका अवतार हुन् ।’
जनकपुर मन्दिरका पिठाधीस राम तपश्वेर दासले अयोध्यामा रामको मूर्ति बनाउन लगिने शिलासँगै जानकी मन्दिरमा सीताको मूर्ति बनाउन अर्को शिला पनि लगिने बताए ।
